Tu puedis fâ ce che tu vûs, ma no tu scjamparâs mai dal blues | Pit Ryan nus conte la sô storie

Nancje nô no vin rivât a scjampâi, anzit, o sin lâts a cirî l’autôr di “No Si Scjampe Dal Blues”: Pit Ryan. Non di batisim Roberto Pettarini, nassût in Friûl tai favolôs (par cualchidun) agns 60.
Dopo album tant che “No Si Scjampe Dal Blues”, “La midisine juste/Punch Drunk” e “Hong Kong Money”, Pit Ryan e i Mad Men Blues a son tornâts cul lôr dret e sclet rock-blues che al rive dai Cuei.
Il gnûf cd “Ancje Bob Dylan si piture i Cjavey” jessût tal Dicembar dal 2015, al puarte la firme di Pit Ryan’s dream anagram. Cun Pit Ryan ae vôs e armoniche o vin simpri Stiv Odor ae ghitare, Jeveman al bas e Muro ae batarie. Il grup al à dedicât il cd al Bicio (“Tune Smith”, il bassist origjinâl dai Mad Men Blues).
Un album di 5 tocs, che Mr. Pit nus descrîf cussì: «”Ancje Bob Dylan si piture i Cjavey” al è un toc di atualitât estetiche – sociâl. Cjalait i politics di vuê mancul zovins che a àn riflès ramâts sui cjavei. Ancje Bob Dylan ae fin al à scugnût piturâsi i cjavei e di chest e je partide la riflession par chest rock-blues un pôc stramp. Il toc al varès vût di durâ 3 minûts ma ae fin o vin doprât altris 2 minûts, parcè che dut ce che al fevele di “His Bobness” no si bute vie, e nancje lis (fintis?) stonaduris».
«Cul secont toc, “Alc di Bon” o cjapìn la cjançon dai Dr. Feelgood, lant indaûr di cuasi 30 agns.
O ai zontât lis peraulis in furlan e o ai variât la melodie par comodâ il toc a un lengaç no tant adat ae musiche, come che ciertis istituzions a volaressin fânus crodi. E – al zonte – no si salve une lenghe metintle inte scjaipule, parcè che al sucedarà tant che al panda in cativitât: no si riprodusarà plui».
“Gengis Khan” al è il prin toc par talian che il grup al regjistre. La musiche e je declinade al rocksteady e il bassist al à volût regjistrâlu cence prin ve scoltât il toc origjinâl.
99 seconts di bas “nicely out of tune” a fasin il cuart toc dal Cd: “Alcino Sorcas”. «Il toc al è une dediche a fin di ben (si intint..) a un gjornalist che si ocupe (ancje) di musiche locâl par un famôs cuotidian, ancje locâl. “Alcino” al stâ par l’anagram dal non e “Sorcas” dal cognon, ma chescj o vês di scuvierziju di bessôi».
L’ultin toc al è une cover di “Back In The U.S.S.R.”, la cjançon che e vierzè il “White Album” dai Beatles.
«Scusait se la peraule “beach” cjantade in velocitât e devente “bitch”, ma se o vês vût cualchi aventure estive su la splaze, o savês che tantis voltis lis dôs peraulis a coincidin. In anteprime o vin ricevût coments tant che: “mi plâs plui dal origjinâl dai Rolling Stones!”».
Fevelant di plans pal futûr, Pit Ryan nus confesse: «il gno unic displasê al è chel di no jessi rivât (par cumò) a dâ une buine forme musicâl a cualchi idee, ma in ogni câs mi sint plui un che al dopre la musiche par esprimi se stes. Di là de Manie a disin: atitudin “DIY” (Do It Yourself), in furlan “FDB” (Fasìn Di Bessôi). O vin dome di cirî di gratâsi un pôc mancul dulà che al pice. Se a son rivâts lôr, o rivarìn ancje noaltris…(maybe) ».
Par vê novitâts di Pit Ryan e i Mad Men Blues, o cjatais in linie i lôr profîi Facebook, Soundcloud e Bandcamp. Pit Ryan us consee di lâ su youtube a cirî “Pit Ryan Si Lavore”: «o cjatarês une version dal vîf (un pôc scloteade) dulà che o sin dome jo e la ghitare. O ai sunât pocjissimis voltis di bessôl (de serie tonalitât preferide: “chiave di be-sol”)». ❚
✒ Moira Pezzetta
___________________________________________
Pit Ryan nus conte la sô storie:
«O ai tacât a sunâ blues tai prins agns 80. La idee e jere chê di riproponi tocs che a vessin a ce fâ cul blues ma ancje cul pub-rock inglês, dal moment che o soi fan dai Dr. Feelgood.
Al è propit lant a cirî cui che al jere l’autôr di tocs tant che “Rolling & Tumbling”, “I Can Tell” o altris, che o ai scuviert Muddy Waters, Howling Wolf, Bo Diddley, Sonny Boy, e dopo o soi deventât une specie di colezionist di robis “minôrs”, di int pôc cognossude.
Prin dai Mad Men Blues o vevin fate une cassete cun 4 tocs, che cumò e je vignude fûr in CD come “One Way Out”. Il toc principâl al jere une cover di “I Want To Be Loved” di Dixon e Waters, e che sôl dopo o vin scuviert jessi stât il viers B dal prin 45 zîrs dai Rolling Stones.
Scoltâlu cumò mi imbarace un pôc: il test lu vevi tirât fûr a orele di un disc di Waters dal 1976.
Dopo chest lavôr a son nassûts i Mad Men Blues, che cun variis formazions a son ancjemò ca… Dute la storie e je contignude tal libri “Blues Dei Colli” a cure di Andrea Cardinale & Blues Club 356. Dentri a son ancje 25 pagjinis di interviste a Pit Ryan (che o podês saltâ). Daspò mi soi metût a fâ alc in furlan, ancje se za di timp mi jeri dedicât a chest. Tant par dî: il prin toc di Fabian Riz, lu vin regjistrât ca di me». ❚ ✒ M.P.