TV FRIÛL E CJANÇONS. F Factor – Il talent di jessi furlans

Di talent show cun int che e cjante e che e bale o sin plens fin parsore i cjavei. E soredut, cui aial dite che vê “talent” al vûl dî dome cjantâ e balâ?
Ve chi alore il reality che al savoltarà ducj i palinsescj: “F Factor – Il talent di jessi furlans”.
Dôs scuadris: di ca e di là da la aghe. Doi judiçs: Lorenzo Petiziol e Gigi di Meo.
Ma soredut, cuatri dissiplinis par scuintrâsi e misurâ la furlanetât dai concorints.
PRESELEZION: LAVORÂ_ Prime di dut, pe selezion iniziâl, la prove di “lavorâ”. E je la prime prove di selezion de storie che e dure un mês intîr. Le passe cui che al lavore di plui e si lamente di mancul. Cui che al finìs dut il so lavôr, al scomence a fâ alc altri (par esempli, piturâ i mûrs dal studi de trasmission o comedâ lis telecjamaris rotis) e al passe diret al turni dopo. Cui che al domande feriis prime de fin dal mês al è scualificât parcè che al è triestin.
PRIME PROVE: SPARAGNÂ_ Finide la selezion, si scomence cu la prime vere prove: chê di “sparagnâ”. Cui bêçs cjapâts te prove di selezion, i concorints a àn di fâ la spese par un altri mês. Un pont a cui che al rive a sparagnâ almancul il trente par cent, doi ponts a cui che al fâs sù un ort e un gjalinâr e al sparagne ancje pai mês che a vegnin. Cui che nol rive ae fin dal mês e al domande un prestit al è scualificât parcè che al è triestin.
SEMIFINÂL: RANGJÂSI_ Pe semifinâl, vie cu la prove di “rangjâsi”. I concorints a son metûts di front di un imprest rot, un mobil di tirâ sù, un lavôr di cjase di fâ. Un pont a cui che al rive a fâ dut dome clamant l’amì just par judâlu, doi ponts a cui che al fâs dut di bessôl. Cui che al clame il tecnic, il marangon o l’eletricist al è scualificât parcè che al è triestin.
FINÂL: APERITÎF_ E par cui che al passe dutis lis provis, la finâl: la prove di “aperitîf”. Un pont a cui che al ordene un spritz (cence Aperol), doi ponts par cui che al ordene l’un par doi. Un bonus speciâl par cui che cuant che al bêf al zuie ancje a more (nissun scualificât, parcè che nissun triestin al rive mai fin chi. In gjenar a domandin feriis ducj te prove di selezion).
IL PREMI_ Cui saraial a vinci dutis lis provis e a dimostrâ di vê il “F Factor”? E soredut, cuâl isal il premi finâl? E je chi che e rive la carateristiche plui rivoluzionarie dal talent show: nol è nissun premi finâl. Di fat, il furlan si contente di ce che al à sparagnât te seconde prove. ■
BETE DI SPERE