Un album cetant spietât. I Braul nus contin di furlans e Friûl cun “Barlums. Canti d’inchiostro”

«Cun chest progjet o vin volût dâ vôs a cualchidune des tantis storiis che a àn contribuît a definî la nestre grande identitât culturâl.»
◆ A cuasi 20 agns de publicazion dal lôr ultin album e a 27 dal prin, o podìn infin scuvierzi il gnûf album dai Braul! Us vin za anticipât, te interviste de Patrie (Barlums, un barlumâ di peraulis) che il grup storic dal Friûl di soreli a mont al jere daûr a prontâ alc di preziôs.
◆ Chescj musiciscj a son stâts il grup di riferiment tal troi di rinovament dal folk furlan e a cjapin il non di un demoni de Cjargne che al fâs di vuardie a un cjalderon plen di monedis di aur tra i rudinaçs dal cjistiel dai Conts di Luìnt, sore Salârs di Ravasclêt.
◆ Tal 2023 i Braul a son tornâts a fâsi sintî cun buinis gnovis par ducj i lôr amiradôrs.
«Dâ vôs aes storiis, ai libris de nestre tiere e su la nestre tiere, e voltâju in musiche» al è il progjet che il grup al à puartât indenant e che al à fat nassi il gnûf disc che al à titul “Barlums. Canti d’inchiostro”.
L’album, che al è za disponibil in formât CD, al è stât presentât in anteprime al Capitol di Pordenon te suaze dal percors “Dedica incontra” de associazion Thesis.
Prin ancjemò che al jessedi, il grup al à ricevût il preziôs prin puest dal premi leterari “Salve la tô lenghe locâl 2023” in Campidoi a Rome, propit pai siei tescj.
◆ Il gnûf lavôr al è animât dal solit spirt di inovazion e di sperimentazion musicâl, e al met adun la gnove formazion dai Braul: Nicoletta Cattaruzza ae armoniche, Sonia Altinier al violin, Gabriella De Cesco ae vôs e percussions, Giacomo Traina ae ghitare, bouzouki e vôs, Claudio Mazzer aes percussions, flaut, pivis, ghitare, bouzouki e vôs, e Andrea Gaspardo al bas eletric.
◆ La idee par chest progjet e à scomençât a cjapâ forme dopo de scriture dal toc dal lôr tierç album “La farina dal diàul”, che al cjape ispirazion dal libri di Carlo Ginzburg “Il formaggio e i vermi”.
Di fat, nus contin «Dopo di chest prin e impuartant lavôr musicâl nassût de lungje colaborazion cun la mai dismenteade poetesse di Navarons, Novella Cantarutti, si sin domandâts parcè no provâ a fâ un toc di musiche tacant di un libri, stant che si pues za imbastî la senegjature di un film. Cussì, tal 2020, o vin decidût di cjapâ in man chel progjet che o vevin lassât a miezis, par meti in musiche cualchidun dai libris intrigants che o vin vût il plasê di lei.»
◆ Di dut chest al è nassût un album, là che il grup al à fat un lavôr di ricercje lunc, che si ispire a oparis di scritôrs furlans, talians e forescj e che al ten dentri tescj di “Le indemoniate di Verzegnis” di Pietro Spirito, dal fumet “Tina Modotti” di Paolo Cossi, “Il sogno di una cosa” di Pier Paolo Pasolini, “Canzone friulana” di un autôr anonim, “Viaggio nella notte della Chiesa di Aquileia” di Gilberto Pressacco e Raffaella Paluzzano, “Le amare erbe” di Ornella Lazzaro, “Questa sera verrà il bello” di Giulia Sattolo, “Italiani sulle rive del Bajkal” di Elvira Kamenščikova e infin di “L’ultimo cimbro del Cansiglio” di un autôr anonim.
◆ L’album “Barlums. Canti d’inchiosto” al rapresente la lûs che lis notis musicâls a produsin e che a iluminin il test leterari, e al trasforme l’ingjustri di nûf storiis in nûf cjançons. Ognidun di chescj tocs al è particolâr, e lu capìn za ancje dai titui, che a son: L’om di Vallorch, Santa Sabida, Trasparenses, Anzoleta Da Le Rive, Vosaries, Il Sium, Chilometro 9288, Trusse mo, trusse Stilin e Flours di acant.
La orele e passe dal scoltâ notis e musicalitâts studiadis, che a riprodusin i cjants de glesie di Aquilee cuntun stîl che al à tonalitâts dramatichis o misteriosis, ma ancje discjantadis, a melodiis cuntune atmosfere pasoliniane, rindude cuntun acuardi unic in minôr.
◆ Une opare insome che no si pues pierdi!
Scrivêt a bandabraul@gmail.com o telefonait al +39 3472915423 par vê une copie dal gnûf album dai Braul e lait su la lôr pagjine Facebook BraulFriuli par restâ simpri inzornâts. ❚