No si pues contâ la storie de nestre Patrie
in maniere retoriche cence pensâ
a tropis voltis che e je stade “tiere brusade” des vueris di chei altris
Il titul al pues dî dut cence dî nuie, e pûr no podarès jessi che cussì parcè che un concet cence peam gjeografic, antropologjic, storic, al reste sterp.
Al bastarès cjalâ in cualchi libri di storie resint o, pai plui pegris, esaminâ la nestre gjeografie o lis olmis che la storie nus à lassadis a clâr chenti.
◆ Il pinsîr al è nassût tune serade a Visepente (il paîs di pre Toni Beline), là che si presentave un documentari metût adun de passion diletantistiche di doi apassionâts di storie locâl. Si fevelave dal bombardament di Visepente e Vilevuarbe tal Zenâr dal 1944, il prin fat vie pe gnot in chê zone. 15 muarts tai doi paîs, chei che a vevin di liberânus nus copavin, e chei che nus ocupavin nus curavin, un paradòs de storie.
Il finâl dal documentari al à lenzût il stîl disneyan: “… e ducj a viverin contents e serens” (dopo de liberazion).
◆ La Storie no domandarès di dâ judizis, ma dome di jessi contade. Cuant che dut câs si va plui insot, il discors al devente plui ingredeât parcè che nus domande cont dal ben e dal mâl morâl.
15 muarts! Par restâ simpri su chê disgracie… e no rivìn a elaborâ nuie di plui?
Se nol fos avonde, a doi chilometris di chei fats e vîf biade e pacifiche (chê sì) la base de PAN di Rivolt. Cussì mi soi metût a pensâi sore.
Se e je une zone che e à paiât plui di altris il so presit al diu de Vuere, e je chê sot dai nestris pîts.
◆ Te prime vuere mondial i ultins sclops a son stâts sul nestri confin, i miârs di muarts a àn colorât di ros i nestris flums, la miserie contade cussì ben di Agnul Floramo te sô Cuintristorie o tes cjançons di Giorgio Ferigo a son stadis supadis fin te medole de int che lis à vivudis.
Purtrop la memorie je curte e la propagande no si strache di dâ fûr sflocjis nazionalistis che a pandin il concet di trop che al sedi biel murî a vincj agns picjâts suntune bandiere, o sot di jê pe fam.
◆ La seconde vuere mondial ise stade diferente? Dome te cronologjie. Ancje chi, intant che in Europe lis faliscjis dai bombardaments si cuietavin, a Triest ancjemò si sbarave tra todescs, fassiscj, partigjans e titins, pronts par preparâ un altri mûr di muart come chel che al spartive i doi blocs, chel american e chel sovietic. Ma e je stade pâs, no mo? Ise stade pardabon?
Il dopovuere in Friûl al à volût dî “tiere brusade”, impresis che no podevin inviâsi, impresis di stât che no podevin jessi metudis adun. Al jere za scrit dut inte Mozion dal Clero dal 1967, e subit dopo al nasseve il Moviment Friûl.
◆ Il Friûl in “timp di pâs” al jere une caserme grandonone, une tiere che e varès vût di jessi sacrificade (ancjemò!) sul altâr di une patrie cul “p” piçul, une caserme teritoriâl indulà che i militârs a jerin in ogni comun. Il lôr dovê? Fermâ il nemì che al podeve rivâ di soreli jevât. Il cjamp di zûc? Chel al jere – di gnûf – la nestre tiere. La nestre int e jere, come che al scriveve Leo Zanier, libare di scugnî lâ. Lâ a cirî un avignì, ancjemò une volte, tal forest, cence che e fos dade une pussibilitât di podê “formâsi” e soredut di fermâsi. Ator pes nestris monts, fintremai al inizi dai agns Novante, a jerin cetancj cartei che a visavin: vietato fotografare, zona militare!
“Pâs” e à d jessi part di une altre peraule: “libertât”.
◆ Nol è puest indulà che la vuere no vedi lassât un segn. Di Triest fintremai al Pâl grant. Ma dentri di nô, ce restial?
Rivolt al reste un dai “simbui” costruîts dal Friûl; Davian al reste un non che nol fâs scjas, dismenteant lis passe 50- 80 bombis atomichis prontis alì.
◆ Une vôs che o ai sintût tantis voltis: “Nus difindin!” Di cui? E tal câs che a vessin chê di fânus mâl, il “nemì” indulà tacaressial? Tal 1944 a tacarin Visepente, Vilevuarbe e Bean, e no parcè che li e jere int triste, ma parcè che li a jerin lis basis, i aeropuarts. La int e jere un “efiet colaterâl”.
Sino alc di plui di un efiet colaterâl dai events? Di furlans, di oms, no varessino di cjalâ pardabon dentri di nô e provâ a creâ une relazion cu la nestre tiere e soredut… cu la nestre Storie?
Ernesto Balducci al scriveve: “L’om dal futûr al sarà un om di pâs, o nol sarà”.
◆ O vin di vêlu iniments cuant che nus contin la storie, chê cul “s” piçul, privade de umanitât di cui che al à patît, e zontade a un presint cence lidrîs. ❚
