Sfuei Mensîl Furlan Indipendent
Archivi de Patrie

UN FURLAN A MILAN. La ostarie cjantarine di Flavio che no je plui

............

Tal cjamp de ristorazion al è stât un baluart di furlanetât a Milan par agnorums, ma di un pâr di agns al è lât in pension e no si pues plui lâ li di lui a mangjâ frico e cjarsons, e a fâ une tabaiade par furlan. Anzit, par cjargnel. Flavio Gonano al è nassût a Prât, in Val Pesarine, ma di piçul, dal 1961, al è a stâ a Milan. «La famea a era duta ca, a vore», mi conte par cjargnel, e si trasferìs dopo vê fat l’inviament (scuelis tecnichis di chê volte). Al fâs ogni sorte di lavôr. «Tal imprin, i ai fat il metalmecanic, ma vie pai agns i ai fat ancja il vendidôr de Folletto, par dimostrâ a me stes che i eri bon di entrâ tas cjasas da int». Si jere tai agns Sessante, e Flavio al fâs ancje cualchi an in Afriche, in Sudafriche e in Rhodesie (cumò Zimbabwe).

Tornât a Milan, al veve però une altre pice. A Flavio i plaseve la gnot, ancje par vie de sô passion pe musiche. «I ai comprât la prima ghitara a 16 agns, cui straordenaris di metalmecanic» e al frecuente lis ostariis li che si cjantave e li che si podevin cjatâ chei che a àn fate grande la cjançon milanese – Nino Rossi, Nanni Svampa, Walter Valdi… -, ma ancje li che al podeve sfogâ la sô passion par Brel e Brassens. Di Brassens, al à ancje voltât lis cjançons par cjargnel.

Une altre pice e jere chê di vierzi un ristorant furlan, e cussì al met dongje lis sôs passions e, dopo cualchi esperience classiche te ristorazion, al rive a meti in pîts il ristorant furlan “Vecjo Friûl”, che dopo al cambie non in “Mandi”. Dut, insiemi ae sô femine Silvana, romane, che però e fâs la gubane in cjase, cjantarine ancje jê. Il “Mandi” e jere une ostarie come che le voleve lui, li che ae fin si cjante ducj insiemi par talian, furlan, milanês, francês… Par agns, l’unic ristorant furlan di Milan.

Tante int e tancj “furlans a Milan” a son passâts di li. Un amion di Flavio al è Giuseppe Battiston, l’atôr, cognossût cuant che di zovin al faseve i cors di teatri a Milan. «Una roba i ai di dîcji però, sui furlans: l’otante par cent des critichis, se cualchi volta mi rivavin, a jerin lôr».

«Ben – i fâs -, chê e je une marche di fabriche», e ancje lui si fâs une ridade.

Trancuîl, Flavio, il “Mandi” mi mancje a mi, e ancje a lôr. ❚

Dree Venier

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +