Ae esplorazion de Furlanie di frontiere, che si è fate siore vie pai secui
O soi simpri stât cetant convint che il Friûl al seti une intersezion di gjeografiis, lenghis, paisaçs e storiis che a vegnin di tant lontan a imbraçâsi propit chi di noaltris, e che insiemi a dissegnin une realtât miscliçade e plurâl, uniche, e par chest preziose. Alc di protezi e ancje di promovi tant che un model virtuôs, parcè che al podarès deventâ une prospetive gnove, inclusive e pûr braurose di se, intun mont là che al somee che la globalizazion e vedi la ultime peraule su la culture identitarie, scjafoiantle, o che la matetât dal principi di sanc, ereditari tant che esclusîf, e cjapi simpri la ocasion par tirâ sù une bandiere (mai la tô!) e domandâti di murî o di copâ par onorâle. Di plui, e je une conferme che la identitât no je une lastre di piere che no cambie mai, e duncje che e riscje di crevâsi o piês di deventâ une epigrafe tombâl, ma pluitost une fuarce magmatiche, potente e ferbinte, che e bôl di continui, cjapant – secul vie secul – formis e savôrs diferents, tignûts però dongje di un leam potent, vitâl e maraveôs che al devente dificil di definî, fintremai di capî, epûr che al esist, che si fâs lenghe, cjant, cussience coletive, sium, architeture, paisaç.
◆ E ancje musiche, utopie, progjet, economie. Parcè no, cusine: un golôs come me al sa ben che tal plat si guste simpri la culture di un teritori. In struc, che al florìs cun chel flât che i umans e clamin vite. In cheste dimension, l’ôr, il confin di une tiere a deventin une regjon ancjemò plui inmagante di esplorâ che no il cûr, la polpe. La perifarie e je simpri cetant plui interessante di ogni centri, dal moment che e rive simpri a sorprendi. Mi plâs pensâ che al sedi come pe piel: chel misteriôs continent (tal sens che al conten) là che a corin i sgrisui e a colin i sudôrs. Là che si vierzin lis feridis, ma ancje si gjoldin lis cjarecis. Il principi di une fin o la fin di ogni principi. Parcè che propit li, su la piel, la membrane si fâs sutile, osmotiche, porose. Duncje, cemût sono i furlans che a vivin propit su la frontiere? Cui sono? In ce maniere rivino a restâ furlans come ducj chei altris, e pûr si sint che a puartin dentri di lôr un alc che ju fâs diferents? E cuale frontiere meretie di jessi esplorade, par cheste gnove rubriche che mi è stade consegnade, dal moment che chi di nô a ’nd è tantis, plui di ce che la cjarte gjeografiche e mostre? Chê cul Venit, e duncje la Italie? O la puarte che si vierç cu la Carinzie, e duncje chê aree todescje che des Alps e rive sù fin tal Mâr dal Nord? Forsit chê Adriatiche, mediteranie, latine? Cuant che i amîs de Patrie – che non finarai mai di ringraciâ par dute la fiducie che mi regalin ogni an, consegnantmi il compit di pandi la mê vôs ogni mês – mi àn domandât di fâ un viaç su la frontiere plui estreme e plui complicade di dutis, ven a stâi chê a soreli jevât, mi soi subit ingolosît.
◆ E, come che mi sucêt simpri cuant che la propueste e je inmagante, o ai tacât subit a meti dentri dal russac che o doprarai par torzeonâ a pît dilunc de linie orientâl, libris, cuadernis di aponts, mapis, cronichis antighis, fotografiis e tante curiositât di pandi e di condividi cun ducj chei che a varan la pazience di stâmi daûr in cheste aventure, che mi regale un morbin dificil di contignî o di platâ. L’itinerari al partìs di Rabil e al va indenant di rive jù, sepidiu fin dulà (lu scuvierzarai vie pe strade), e cun ce digressions, divagazions, ingjâfs e budiei, dal moment che o soi cussient che il percors nol podarà jessi definît o ancjemò piês definitîf. Al sarà tant che cjaminâ su la riviere de marine, là che no tu sâs mai dulà che e scomence la aghe o che e finìs la tiere. Là che si cjatin maraveis spudadis dal profont, e ancje i refudums di cualchi naufragji. Dulà che tu scuegnis cjaminâ discolç, cuasi par rispiet di un lûc che al à alc di sacri. Cu la cussience che dal to pas no restarà olme. Une lezion di umiltât che a varessin di imparâ subit ducj chei che a intindin contâ une tiere. Mi impromet di traviersâ valadis, di incuintrâ testemonis o di memoreâ personaçs plui o mancul famôs, plui o mancul dismenteâts.
◆ Mi plasarès podê contâ ancje i lûcs che o traviersarai su la mê strade: une place, une glesie, une ostarie. Un borc aromai bandonât dai umans, ma plen di chê memorie che si fâs Storie. Sì, lu sai ben: chest confin nol è dome chel dal Friûl di vuê. Ma par secui al è ancje stât contindût des sgrifis di ducj chei stâts che propit fin chi si son slungjâts, pretindint di batiâlu cul sanc. Soredut il nestri. Par secui. Anzit no, par miârs di agns. Su cheste linie che o stoi par bati, lis tribûs dal Iliric si confrontarin cun chês dai Celtis. I tiermins di Acuilee prime, e po dopo chei di Vignesie, si son spostâts di continui cun chei Imperiâi. La corone prepotente dai Savoiarts e à fat cuintri a chê dai Asburcs di Viene. E par buine part dal ‘900, e je stade la Jugoslavie a distirâsi “od Triglava do Varvara”, juste di chê altre bande: prime chê dal ream dai Karađorđević e po dopo chê dal maressial Tito, cuant che a Gurize si respirave l’aiar di une piçule Berlin. Ce che al è sucedût dopo e je storie plui che contemporanie, simpri zuiade sul stes confin, dal 1991 – cuant che la vôs de vuere e tornà a berlâ su la puarte – fin ore presint, che ancjemò e oblee i Furlans orientâi a impuestâ la lôr vite sul ôr dal mont. Che mai come cumò chi di nô si fâs balcanic. Atenzion, chestis no saran notis di storie, ma il ritrat contemporani di une “Furlanie” dal sigûr fûr di scuare, cualchi volte imprevedibile, simpri straordenarie, intal sens etimologjic di “fûr dal ordenari”. Di là de metafore, l’intindiment di cheste gnove scriture al è propit chel di fâ esperience di chê anime furlane che, ingrimpade sul fîl de gjeografie, e à imparât de storie a no pierdi mai la sô identitât, anzit, le à fate ancjemò plui siore.
◆ E dut chest, vuê come in chê volte, al oblee a jessi ecuilibriscj. Par fuarce: chei che a vivin suntun fîl a scuegnin jessi come chê mime straordenarie che si clamave Bassilla, memoreade intune lapide di Acuilee dal secul III de ete volgâr. Al somee che la vôs furlane “bacilâ” e vegni propit di jê. Un “habitus mentis” di ducj chei che, cjaminant su la ponte dai pîts dilunc di une cuarde peade sul vueit, a fasin di une necessitât la lôr virtût. Al somee che a balin, che a svolin, jenfri marculis e miracui. Cualchi volte, come Bassilla, ancje a colin, e si sfracain in bas. Un pericul che nol tocje mai a ducj chei altris, che invezit a àn miôr stâ simpri cul cûl par tiere, cence fastidis di sorte. No riscjin mai nuie. Ma si pierdin la emozion dal svol. ❚
