Un jutori concret al mont de scuele in regjon

La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il miorament di spazis, strumentazions didatichis e sportivis, ma ancje bogns esemplis di puartâ ae atenzion dai plui piçui. Dongje di chest, il bant al sburte ancje bande il compagnament des classis di testimonials par che a puedin alimentâ riflessions e aprofondiments sui valôrs civics, imprenditoriâls e di svilup sostignibil. Di bande sô, la Fondazione Friuli e à za individuât un pâr di chescj testimonials, ven a stâi la patulie acrobatiche des Frecis, i ex sportîfs olimpionics de regjon, l’ex cjapitani de scuadre taliane di volley Franco Bertoli che al à ideât il spetacul “Panchine pensanti”, ma ancje i esperts di Intesa Sanpaolo e lis Pmi sostignibilis. «Intune situazion complicade che e ven dal confront cun modei familiârs simpri plui diviers e diversificâts – al à dit il president de Fondazione Giuseppe Morandini – dulà che po e à colpît la pandemie, o vin regjistrât une grande capacitât di reazion des scuelis che a àn savût esprimi progjets e dâ continuitât ae lôr realizazion. O ringraciìn insegnants, dirigjents e ancje gjenitôrs che insiemi a àn savût dâ rispuestis aes disbisugnis di students e comunitâts». «Il sisteme scolastic dal Friûl-Vignesie Julie no si è mai fermât, rivant a garantî la cualitât di une ufierte formative moderne, fuarte e diversificade, no cate lis grandis dificoltâts leadis ae pandemie», e à dit la assessore regjonâl pe formazion Alessia Rosolen. «O sin braurôs di sostignî ancje chest an – e à dit Francesca Nieddu, diretôr regjonâl di Veneto Est e Friuli Venezia Giulia Intesa Sanpaolo – la Fondazione Friuli: cun cheste realtât o condividìn l’impegn pes gnovis gjenerazions e la volontât di continuâ a meti in at iniziativis che a judin a contrastâ lis disavualancis e il disasi causâts dal isolament e dal distanziament sociâl». Al bant dedicât ae istruzion de Fondazione Friuli a puedin partecipâ lis scuelis publichis o paritariis des provinciis di Udin e Pordenon. ❚