No stìn a spietâ indicazions dal alt: e je la ocasion par un progjet educatîf gnûf
Dopo des diviersis ipotesis e dai dubis su lis modalitâts par inviâ il prossim an scolastic, des posizions cjapadis di docents, gjenitôrs e students, si cjatìn di front a di un svolt: par une scuele vere, reâl – cuntune didatiche in presince – si varà di rispietâ lis cautelis necessaris, prin di dut il distanziament fra lis personis. Passade la ribelion ae idee di inscjaipulâ i students in struturis di plexiglas, e reste la necessitât di pensâ a une riduzion dal numar dai arlêfs di ogni classe o di cjatâ locâi plui grancj di chei cumò a disposizion. No pensi che al sedi il câs di spietâ dal ministeri – che nol mostre masse snait – indicazions pratichis par tacâ in sigurece il prossim an di scuele. Nol è plui timp di tontonâ e di rimbecâsi, e e je la urgjence di fâ une propueste/progjet di presentâ noaltris al ministeri, domandant in maniere ferme lis risorsis e l’organic che al covente pe atuazion, e evidenziant motivazions e finalitâts. Di furlans, no vin di fermâsi a spietâ jutoris dal alt, ma o vin di tornâ a chel pragmatisim, a chel sproc che nus à simpri caraterizâts tal frontâ lis dificoltâts de vite, o ben ravaiâ lis maniis e dâi sot!
◆ A meti dongje chest progjet, al à di jessi un grup di lavôr cu lis diviersis competencis de scuele, dai varis ents e istituzions, dal mont economic, imprenditoriâl e des professions. Cheste e sarès la ocasion par elaborâ un model “Scuele Friûl” e di inviâlu par rindi di fat regjonâl chê competence che tancj a sperin di vê ancje di dirit.
◆ Bisugne cjalâ indenant rispiet al dibatit su “didatiche a distance” o “in presince”: al è il moment di rifleti su dut il model educatîf di adotâ. E par sielzilu, no si pues fâ di mancul di pensâ a cuâl model di citadin che si vûl rivâ inte azion educative di formazion, a cuâi obietîfs, e cualis competencis che si vûl promovi. E par che al sedi un “model furlan”, al à di nassi cul contribût di ducj: ae scuele e ai tecnics de educazion, il compit di individuâ cemût realizâlu ben e in curt.
◆ Ancje jo o crôt che, in moments dificii tant che chei di cumò, al coventi “pensâ al impussibil”, come che al dîs Alessandro Baricco. E pe scuele e pal so avignî, chest al vûl dî – prin di dut – saltâ fûr de logjiche dal “no si pues”, “nol è previodût”, o dal “si à simpri fat cussì”, “no sin preparâts”! Cun di plui, ancje tignint in considerazion lis dibisugnis dai diviers puartadôrs di interès, si à di tignî cont prin di dut des esigjencis dai fruts e dai fantats, e de lôr cressite inteletuâl, emotive, sociâl… Al è compit de scuele insegnâ a vivi inte contemporaneitât. La societât e je in evoluzion e la scuele e à di lâ pâr a pâr cui timps, cence lassâ dut câs in bande lis componentis fondamentâls de educazion di ogni timp.
◆ Se si domandìn cuâl model di citadin che o varìn di lâ a formâ, la lezion dal corona virus nus jude a figurâsi simpri di plui un citadin che al à di deventâ protagonist de tutele e dal disvilup de sô comunitât, che al à di cognossi e di interpretâ i siei valôrs, e di cressi tant che persone colaborative, rispietose di chei altris, dal ambient, de nature, dai siei ritmis e dai siei ecuilibris.
◆ Ce percors podìno imagjinâ, cun ce imprescj, cun ce contignûts e in ce timps, par rivâ adore a formâ un citadin di cheste fate?
◆ Rifletìn: a) lis competencis misuradis des provis INVALSI – che a condizionin une vore in dì di vuê la ativitât didatiche – sono lis plui impuartantis tal disvilup integrâl e armonic de persone? Sono plui impuartantis des competencis afetivis e relazionâls o de creativitât, o dal spirt e de capacitât colaborative o de autonomie?
b) La distribuzion atuâl de rêt scolastiche, ise adate a ridusi lis diferencis fra i citadins de varis zonis o di areis sociâls diferentis de nestre tiere, promovint in ognidun il disvilup dai lôr talents? O ise plui funzionâl a fâ vignî fûr lis ecelencis dome di cualchidun di lôr? Par esempli, lis scuelis de infanzie, lis elementârs e lis mediis a son presidis di socializazion, di agregazion e di acuisizion dal sens di apartignince a une comunitât, recuisîts impuartants pal disvilup armonic de personalitât. Par sigurâ chest presidi, no si pues escludi il ricors aes pluriclassis, passant parsore di vecjos tabù, in considerazion dal fat che i risultâts vignûts fûr tes realtâts là che a son ativadis a fasin pensâ che a puedin costituî la gnove frontiere de didatiche.
c) Covential sburtâ a iscrivisi tai istitûts plui grancj dai cjâf lûcs dulà che intes variis ativitâts e prevâl une competitivitât alte? O – demitizant il prejudizi su lis oportunitâts formativis plui gruessis des scuelis grandis – no si puedial fâ in maniere che i students a tornin a inviâsi viers scuelis dimensionadis in maniere plui juste e funzionâls tes zonis là che a son a stâ – là che si cjate cun plui facilitât un clime di colaborazion – cuntune interazion tra scuele e teritori che e insiori ducj i doi? Lis nestris a son dutis “scuelis di ecelence”!
◆ Lis pre cundizions par rispuindi a chestis domandis in maniere apropriade a somein utopiis:
– il superament dal eficientisim e de ricercje di ridusi i percors formatîfs;
– l’abandon de tarlupule de “scuele aziende”, valutade su la cuantitât di competencis funzionâls al sisteme che i arlêfs a cjapin sù dispès inscuelâts di pueste:
– disponibilitât ae adozion di une didatiche ative che e ridusi la competitivitât ma che e promovi lis competencis cooperativis che a fasin cressi la culture de interdipendence; promovi il passaç di une “motivazion che e ven di difûr” (fondade sui vôts, su la aprovazion dai parincj e de societât…), ae “motivazion che e ven di dentri” (fondade su la cussience – di bande dal student – dal valôr de preparazion, de cognossince, e v.i.).
◆ Orientâsi suntun model di cheste fate, cuntune scuele plui sparniçade sul teritori, al judarès a cjatâ plui spazis, recuperant struturis dismetudis o pôc dopradis par vie dal calâ des nassitis, in part cul adatament di chês di altris ents o privâts (oratoris, palestris, spazis espositîfs…). In cheste maniere, si gjavarès pression sui istitûts des citâts e si larès a ridusi il probleme dai traspuarts, lis spesis e i timps par rivâ a destinazion.
◆ Sigûr e covente la disponibilitât di ducj, parcè che te scuele e cu la scuele si va a dissegnâ l’avignî de societât. Par chest, ducj a àn di sintîsi in dovê di concori a meti in pîts, tal rispiet dai rûi e des competencis di ognidun, un model gnûf che nol è dome pussibil, ma che al è ancje necessari. ❚
