Publicâts i ats des cunvignis di une esperience di fonde
pe politiche e pe culture dal Friûl dai ultins agns
Ce ise stade la esperience dai “Laboratoris di Autonomie”? E ce aie lassât? Cu la publicazion di trê volums di ats des cunvignis e di une biele schirie di video sclesis curadis di Massimo Garlatti-Costa, la associazion “La Grame” e à cirût di tignî la memorie di une esperience di fonde pe politiche e pe culture dal Friûl dai ultins agns. Un viaç speciâl aes lidrîs de specialitât, stiçat dal bas di un grup di sindics che si son metûts dongje par resonâ in maniere trasversâl su cemût valorizâ une identitât che no resti robe di museu, ma che e deventi un sburt pal nestri avignî.
A jerin i timps de riforme ai ents locâi, de riforme des Uti, lis Unions teritoriâls intercomunâls, che e gjavave ai municipis competencis cence dâur risorsis: e di une riforme costituzionâl tant che la Renzi-Boschi che e menaçave di mudâ il Stât in clâf centraliste. La mobilitazion dai sindics e je stade un dai prins ats concrets di afermazion de centralitât des comunitâts propit cuintri di une politiche regjonâl e taliane che e leve a strenzi simpri di plui i lôr tiermins di manovre.
Chescj sindics a jerin 12, come i apuestui: ma apuestui di une fede che e jere lade fûr di mode, chê de autonomie. Se o cjalìn la storie dal pinsîr autonomistic intal ultin secul, o viodìn che la evoluzion de sô parabule e va sù e jù daûr des fasis de nestre storie. Cun pichis di grande vivarositât e fuarce propositive, e ancje cun moments di sium. Une prime bugade e je stade daspò de Prime Vuere, cuant che soredut int tant che Luigi Faidutti e Giuseppe Bugatto e domandave che «Nissun al disponi di nô cence di nô», e Achille Tellini al pensave che e fos fintremai pussibile la indipendence dal Friûl. Po al è vignût il Fascio e si sin cjatâts a jessi “sentinele de Patrie”, e par fevelâ di autonomie o vin scugnût spietâ il 1945 e oms di capacitât visionarie al limit dal profetic: Pier Paolo Pasolini, Gianfranco D’Aronco, pre Bepo Marchet e Tiziano Tessitori.
La fuarce di cheste idee salacor e je lade smamintsi tai agns ’50, ma tal 1963 e je rivade la Regjon Autonome e in chest gnûf organisim avonde malnassût al à tornat a vê impuartance scombati a pro dal Friûl. Mozion dai predis furlans, nassite dal Moviment Friûl, bataie pe Universitât a son stadis il risultât di une gnove cussience autonomiste che e je cressude tal mieç de int. Ancje in gracie di cheste culture dal “miôr fâ di bessôi che spietâ Rome” al è stât pussibil il miracul de ricostruzion. Ma propit cul boom industriâl e economic che al è stât intai agns ’80, la idee di autonomie e je colade in sium pal masse benstâ.
Ae fin dai agns ’90, il flum carsic dal autonomisim si è sveât di gnûf cun Sergio Cecotti e Marzio Strassoldo, personalitâts diferentis, ma che a àn interpretade la voie di identitât dai furlans: dopo di lôr si è tornât a distudâ tai furlans il valôr dal autoguvier. La autonomie e je deventade une Biele Indurmidide in letarc, ma a dismovile a son rivâts i 12 sindics che a àn mostrât cemût che in cheste idee nol è dentri dome un vant pal nestri passât, ma soredut une clâf pal disvilup dal nestri avignî.
Intal percors des “Lezions di autonomie” e dal “Laboratori di autonomie”, il prin intindiment dai sindics al è stât chel di riscuvierzi la impuartance dal concet e la sô centralitât a nivel culturâl e politic (in lezions afidadis a Angelo Floramo e Elena D’Orlando). A son duncje passâts a cjapâ in esam cemût meti in vore la autonomie: cun riferiment prin di dut aes risorsis economichis che il Friûl al à a disposizion e al regale ai forescj, come la aghe, ma ancje ae pussibilitât di costituî une fuarce politiche autonomiste tant che il Scottish National Party. Di chestis tematichis a àn fevelât doi sindics speciâi come Franceschino Barazzutti, za president dai prins citadins al timp dal Orcolat, e Sergio Cecotti, che tal 2015 al à prefigurade la disfate che il Pd al varès vût intai agns daspò.
Centrâl e je ancje la necessitât di comunicâ la autonomie, ilustrade di Sandri Di Suald, e di pensâ a un “Think tank pe culture” sotlineade di Federico Rossi. Dome cuntun bon messaç al è pussibil mudâ in ufierte la domande di autonomie che Giorgio Cavallo al à sclarît jessi fondamentâl par resisti ae omologazion, come che a stan fasint in Catalogne (lu à spiegât William Cisilino). Autonomie e fâs rime cun economie ancje par Flavio Pressacco, Fulvio Mattioni e Roberto Muradore, cun energjie par Matteo Mazzolini e Fulvio Stel, cun liturgjie par Guido Genero. E po altris vôs tant che Ferruccio Tassin, Marco Stolfo, Duilio Corgnali, Franco Fabbro, a àn completade la costruzion di un gnûf troi pal autonomisim di doman.
E l’efiet di cheste esperience nol è stât dome chel di un fat culturâl interessant: al è stât dât un sburt decisîf prin ae costituzion de Assemblee de Comunitât Linguistiche Furlane, il puest dulà che i sindics a puedin tignî cont de lenghe e de identitât dal lôr Friûl. E soredut e à permetût di butâ lis fondis pe presince, dopo plui di 20 agns, di un moviment autonomist (il Pat pe Autonomie) e di une fuarce che si riclame a chescj temis (Progetto Fvg) in Consei regjonâl. Par chest, il Laboratori al è stât une sorte di miracul: e un regâl pai furlans, che a varessin di tignî cont des sôs conclusions e di ringraciâ cui che ju à fats cjalâ tal spieli par miorâ la lôr situazion. ❚
Walter Tomada
