Sui siet cuei di Rome si jevin lungjis penis neris. Di Jugn i alpins de Brigade Julia a vuardein i simbui dal nestri patrimoni artistic e religjôs, dal Colosseu al Altâr de Patrie. Plui di 160 obietîfs, cun dentri i sîts diplomatics e i centris di scambi. A son al comant de “Operazion stradis siguris” che e viôt ogni dì i oms e lis feminis dal Esercit in strade insiemi cu lis Fuarcis di Polizie par contrastâ la criminalitât e prevignî la pussibilitât di atacs teroristics.
«Intai ultins agns, cence pierdi di viste la nestre “alpinitât”, o sin stâts preparâts a operâ in senaris diviers di chei tradizionâi», al sclarìs Agostino Castenetto, prin lutignint di Tavagnà.
A puartin cun se esperiencis maduridis in missions tal forest e su lis monts e «ancje la nestre lenghe, pardabon uniche. Mi coionin in maniere simpatiche sul gno acent tant diviers di chel roman», al dîs fasint la bocje di ridi il caporâl maiôr sielt Alessandro Tion di Cussignà. A fasin servizi tra e pe int «cirint di infondi la stesse sperance e definizion che di simpri e marche lis ints di mont», al conte il tenent colonel Umberto Salvador. Al è nassût e cressût a Glemone e si vise ben dal taramot e dal aiût dai alpins «unic di no podê rivâ a pâr, e je stade la sburtade a jentrâ in Academie Militâr. Viodi il vueit dai centris storics di Accumoli e Amadore mi à strent il cûr, mi à visât il gno Friûl». Chel che ur mancje a ducj: Castenetto al passe il secont Istât di file lontan di cjase: «O ai celebrât ancje i 25 agns di matrimoni lontan de mê femine». Il caporâl maiôr sielt Marco Bertossa di Percût al ironize sul trafic: «Une robe tant che la “Cristoforo Colombo” (une vie de Capitâl, ndr) li di nô no esist». Ur mancje un clime miôr, la trancuilitât dai paîs, lis partidis dal Udin al stadi e si sa po il frico, ma a àn une ciertece: «Ae fin su lis nestris monts o tornarai», al sotlinee Tion. Parcè che, al note Bertossa: «L’alpin, cuant che al torne in Friûl, al à di tornâ a dominâ lis Alps Orientâls». ❚
Floriana Bulfon