Par secui Aquilee e je stade il puart plui a setentrioon di dut il Mediterai: la puarte di jentrade di marcjanziis, art e ideis che a vegnin di Nord Afriche e Medi Orient.
In ocasion dai 2.200 agns de sô fondazion, par tornâ a percori lis “trasformazions” de citât, il museu de Ara Pacis di Rome al ospite la mostre “Aquilee 2.200”. Un percors tra i moments plui significatîfs in sens storic: de citât romane antighe, ae Aquilee bizantine e medievâl. E, dopo, il Patriarcjât e la Glesie aquileiese, fint a rivâ al periodi che la citât e je stade part dal imperi asburgjic e infin ai agns de prime vuere mondiâl.
Nassude de colaborazion tra la sorintendence capitoline, la fondazion Aquilee e il pôl museâl dal Friûl-Vignesie Julie, la mostre e met adun un trop di oparis impuartantonis di art romane che a vegnin dal museu archeologjic nazionâl – sicu la iconiche “Testa del Vento” in bronç – e plui o mancul trente calcs di reperts che a vegnin dal museu de civiltât romane e fats intal 1938 in ocasion de mostre augustee de romanitât, cuant che Aquilee e jere la citât plui rapresentade insiemi cun Pompei e Ostie.
A acompagnâ la visite ancje cincuante fotografiis splendidis fatis 40 agns indaûr dal mestri Eli Ciol, cumò o esibidis al MAMM di Mosche e un filmât sui prins doi milenis di Aquilee fat di 3D Produzioni cul apuart di materiâi dal Istitût Luce.
Un percors che al sotlinee il rapuart fondamentâl Aquilee-Rome e la capacitât straordenarie di palingjenesi di une citât, resuride plui voltis dopo invasions, dispueaments, vueris e taramots. Cun une sô esistence che e à vût un significât no dome militâr, politic e economic, ma ancje culturâl e ideâl intal bacin dal Mediterani e intal rapuart tra Orient e Ocident. ❚
Floriana Bulfon