Di Vile di Cjargne ae capitâl taliane a pît. 665 chilometris in 21 dîs par “un percors di vite”, al dîs Gianpietro Donada. Alpin, classe 1975, al è partît aes 7.55 dal prin di Jugn di cjase sô a Vile – la coincidence e vûl propit che e sedi in vie Rome – cun destinazion Altâr de Patrie.
◆ “La idee e je nassude tal Setembar passât, a 25 agns dal gno congjêt militâr; o ai sintût la dibisugne di fâ alc. Ae base, motivazions personâls, il desideri di puartâ un graciis ai zovins militârs impegnâts inte operazion “Stradis siguris” e un salût al Vitorian, ai muarts de vuere, a chel cadavar dentri dal monument dal Soldât no cognossût, daûr de sielte di une mame di Aquilee” al conte. E cussì Donada, cjâf grup de sezion Ana, si alene. Une preparazion meticolose: la partence e je previodude par Març, ma e rive la pandemie. “Dut si è fermât, però no ai molât. O soi lât indenant cui alenaments: prime la cyclette tal tinel, dopo lis cjaminadis a 500 metris di cjase, fin in Jugn, cuant che o ai rivât adore a partî”. O ai cjaminât lant daûr des indicazions di Google Maps, cun su pal cjâf la plume dai Alpins. Prime tape Sant Denêl, dopo Cjasarse, La Mote su la Livence, la Plâf e duncje la strade Romee fin a Ravene. “Di li o soi rivât a Cesene, o ai passade fûr la Umbrie, il parc de Marcigliana e o soi jentrât a Rome de vie Nomentana, rivant propit a Porta Pia”. Un viaç in solitarie, cun disinfetant e mascarute inte Italie traumatizade dal Covid, ma simpri solidarie. “O ai pensât dispès ai tancj muarts bessôi, aes lôr fameis”. Un salût militâr devant dai monuments ai muarts dilunc dal percors, e dopo l’Altâr de Patrie: “O soi lât sù pe scjalinade corint. Dopo trê setemanis, un minût di leture de preiere, une emozion enorme”. Nol jere un pelegrinaç ma al à fat tape ancje a San Pieri, e dopo si è fat un regâl gastronomic te capitâl cuntun tris di paste “cacio e pepe, matriciana e carbonara” parcè che “la mangjative e je culture”. Al è tornât dongje in tren fin a Udin, po di li a Tumieç in machine cuntun amì e l’ultin toc di strade a pît fin a Vile, dulà che lu spietavin i siei afiets e il so amât pastôr belghe. Nissun disconfuart e, ancje se inte fadie, la ciertece di stâ ben parcè che “cuant che une strade e finìs e devente un pas”. ❚