«O varès volût jessi li, ancje par tornâ a viodi amîs e professôrs e fâ chel che o vevin pensât di mês: celebrâ insiemi». Axel Costantini al à vincj agns e il so esam di maturitât lu à sostignût in cuarantene, colegât a un pc di cjase sô intal cuartîr Appio Latino. Chê prove finâl che e je il rituâl di passaç viers dal futûr e devente cumò ancje ocasion par recuperâ il contat uman, ma la pandemie e impon lis sôs regulis: «O ai cirût un svol par jentrâ prime in Italie, ma nol è stât pussibil e se tu tornis dal forest tu âs di stâ dôs setemanis sierât».
◆ Axel, mame messicane e pari di Manzan, al à frecuentât i prins doi agns des scuelis superiôrs a Cividât par dopo movisi al istitût tecnic pal turisim Colombo di Rome.
◆ I siei gjenitôrs a vivin dongje di Puebla de Zaragoza, un centenâr di chilometris di Citât dal Messic, e ai 29 di Fevrâr al decît di lâ li di lôr. «O pensavi di tornâ intal zîr di pocjis setemanis – al conte – invezit o soi restât blocât. O soi stât daûr aes videolezions ancje se cun 7 oris di fûs, e o ai preparât l’elaborât finâl». Ogjet di discussion, i pachets turistics propri cumò che il turisim al è di tornâlu a pensâ. Axel al è fiduciôs, si sint citadin dal mont e al ten vîf il leam cu lis sôs origjins: «O soi nassût in Spagne, dopo si sin trasferîts in Messic, ma ogni an o sin tornâts in Friûl, par chest o ai decidût di studiâ in Italie. No feveli furlan, ma lu capìs». Lu à imparât de none, Graziella Noacco, poetesse che e cjareçave la lenghe mari tornant a tiessi il fîl dai ricuarts. E e je simpri jê, che e viveve imerzude intal bosc insom de culine di Gramoian a Cuar di Rosacis, a vêi passât l’amôr pe nature. Axel al à passât il so esam e si è iscrit ae universitât a Rome. Al studiarà siencis dal turisim «continuant a viazâ viert al mont e cuntune cussience gnove». ❚