Agns indaûr, dal Friûl a son vignûts fûr atletis di nivel internazionâl. Daspò di un câl di passion, cumò la palestre e lis iniziativis dal sodalizi dal president Leonardo Zalateu a otegnin interès e gnûfs tesserâts
La Associazion Pugjilistiche Udinese e je nassude intal 1946, subite dopo de Seconde vuere mondiâl, par dâ ai zovins furlans la pussibilitât di provâ la boxe, daûr dal esempli di Primo Carnera, il prin campion dal mont furlan che al veve cjapât il titul mondiâl intal 1933 a New York. In chei agns, la popolaritât di chê che e vignive clamade la “noble art” e jere cetant grande, e tancj di lôr a vevin voie di montâ sul ring, ancje par cirî di scjampâ de miserie.
◆ Sot dal sburt di int come i mestris Morgante e Birtig, la associazion e je deventade in curt un pont di riferiment par dut il moviment. Prime sot des tribunis dal stadi Moretti e, daspò dal 1957, tal prin plan dal palasport Benedetti, simpri in citât, cul mestri Remo Venzo.
◆ Par contâ ducj i pugjii plui preseâts al coventarès un numar intîr da La Patrie dal Friûl. Dut câs, i plui impuartants a son, dal sigûr, Mario Vecchiatto, campion talian e european, Alfredo Vogrig, Aldo Battistutta e Roberto Sgrazzutti, Alessandro Zuliani, Brunet Zamora, Emanuele De Prophetis e Nicola Ciriani, ducj campions talians.
◆ Une storie maraveose che, di cualchi an, e je tornade di voghe, cuasi come une gnove Primevere pe fradaie dal president Leonardo Zalateu, ancje lui, come ducj, pugjil intai agns passâts.
◆ “A son agns che si impegnìn cu la promozion e cu la ativitât in palestre – al dîs il president – e cumò o vin numars cetant impuartants. O sin une vore contents, massime pe cuantitât di atletis inte fasse che si clame “pre agonistiche”, che e ten dentri ducj chei che si preparin par deventâ agoniscj. La palestre e je plene, cun tante int che e fâs alenament ducj i dîs. E mi fâs plasê contâ ancje i amadôrs, oms e feminis. Plui in gjenerâl, il pugjilât in Friûl al va une vore ben e a son gnûfs atletis che a son bulos a incjarnâ il moviment”.
__
Par merit dal lavôr dai tecnics Gianluca Calligaro, Alessandro Zuliani e di ducj i colaboradôrs preseâts de Societât, a son vignûts fûr tancj zovins di valôr. Fasìn subite doi nons: Lucia Scala e Marco Sollero.
“Doi atletis nassûts e cressûts inte Pugjilistiche, che a son rivâts fin aes finâls pal titul talian intes lôr categoriis. A àn simpri lavorât cun passion e determinazion, cualitâts che un pugjil al scuen vê. Daûr dai insegnaments dai tecnics, si son meretâts ducj i risultâts”.
__
Une biele storie e je la mentalitât de Pugjilistiche di vierzi lis puartis a ducj, pontant, pardabon, su la ospitalitât e su la inclusion, cence tantis peraulis e cuntune vore di fats.
“In palestre o vin pugjii che a rivin da la Afriche, dai paîs arabics, dai Balcans. O vin vût zovins de Ucraine, e ducj si son simpri cjatâts une vore ben. Ancje parcè che, cuant che tu sês sul ring, no si cjale di indulà che tu rivis, ma cemût che tu sâs tirâ di boxe. Cun rispiet par ducj, prime di dut”.
__
O vês un biel sproc: Boxing against Bullism. Ce vuelial dî?
“La ativitât de Pugjilistiche e je dentri di un progjet plui grant che al sburte a impegnâsi ogni dì cuintri dal mût di fâ dai bulos, dai tepiscj. No par câs, la boxe si clame “noble art”: o vin voie e si impegnìn a insegnâ il rispiet, l’assum e il rivuart par chei altris. Cence dutis chês robis achì no tu sês un vêr pugjil e, massime, une persone vere. O fasìn lezions no dome in palestre, ma ancje intes scuelis: o fasìn dimostrazions e o cirìn di jessi un pont di riferiment ancje par chei che a fasin un tic di fature a cjatâ la direzion juste”.
__
La ultime classifiche dade fûr de Federazion e dîs che la Pugjilistiche Udinese e je tal puest numar vincjeun in Italie, pe cualitât de ativitât e pai risultâts dai atletis. E prime in Regjon. Ce sodisfazion!
“Disìn che, in gjenerâl, il pugjilât al è daûr a tornâ di ca, ancje se jenfri tantis dificoltâts. O viôt che a son ator tancj atletis di bon nivel. Un al è dal sigûr Luca Chiancone, un nestri regjonâl che al à cjapât di pôc il titul talian dai pês medis: un zovin studiât, laureât, inteligjent, educât. Un biel esempli par ducj. In merit a noaltris, intal 2022 o vin vierte une sezion a Tumieç, sot dal sburt di Marco Sollero. Cumò o ’nt vin vierte une a Tor di Zuin, cul tecnic Gianni Stroppolo. La ativitât a Udin e je simpri chê plui numerose e impuartante. Sperìn di lâ indenant cussì.” ❚
:::::::::::::::::::::::::::::::::::::::::::::::::::::::::::::::::::::::::::::::::::::::
A Tor di Zuin e sverdee la tradizion
Il mestri Gianni Stroppolo al è il responsabil tecnic de palestre, vierte in paîs, daspò di plui di sessante agns di spiete
La Pugjilistiche a Tor di Zuin e je nassude tal 1955, cuant che il mestri Alessandro Zucco al à tacât a insegnâ lis fondis de boxe ai zovins, inte palestre des scuelis, in place dal Popul. Daspò di cualchi an, ducj i atletis a àn scugnût lâ indenant cu la ativitât intal teatri di Tor, parcè che nol jere plui spazi in palestre. Fin che, intal 1960, la associazion e je lade a Tisane.
◆ Dut câs, par vie de passion e dal inzen di Zucco, di Tor a son vignûts fûr atletis cetant preseâts. Si ricuardisi di Enrico Pradal, fi di Giacinto, il custodi de palestre, Claudio Turco, i doi fradis Piva, Sergio Lostuzzi, Erminio Pizzali. Fintremai dentri tal teatri e fûr inte place o tal stadi de Saici, che cumò al è dedicât a Beppino Tonell, la int e à gjoldût di diviers incuintris, metûts sù de Associazion locâl.
◆ A metât di Avrîl dal 2023, sot dal sburt dal mestri Gianni Stroppolo, un dai tecnics de Pugjilistiche Udinese che al è a stâ propit a Tor di Zuin, si à rivât a vierzi in paîs une gnove sezion distacade dal sodalizi di Udin. Juste inte palestre indulà che si alenave il mestri Zucco sessante agns indaûr. Une volontât di tirâ sù ancjemò une volte une tradizion che a Tor e je pardabon buine e preseade.
◆ La inaugurazion de gnove iniziative, la seconde sabide dal mês passât, e à clamât in place une vore di int, tancj apassionâts e, di vuelin, cualchidun dai vecjos campions di Tor di Zuin. Cuasi cu lis lagrimis intai voi a viodi tante passion tai zovins che, cumò, a àn la responsabilitât di tignî alte la tradizion. ❚
:::::::::::::::::::::::::::::::::::::::::::::::::::::::::::::::::::::::::::::::::::::
Dut un an di manifestazions, ator pal Friûl-Vignesie Julie
Tancj events par gjoldi la miôr “noble art” furlane
Forsit, intai agns passâts a jerin plui manifestazions di pugjilât a Udin e in Friûl: un tic di dificoltât economiche e la volontât di meti in evidence dome i atletis di cjase – come che al è just cuant che une Societât e impegne risorsis – a àn staronzât i events. Cundut che si cîr di tirâ sù la cualitât.
◆ Intal mês di Zenâr, la Pugjilistiche Udinese e à bielzà metût adun une manifestazion al Città Fiera di Martignà: il ring poiât jù intal “Show Rondò” e il spetacul ufiert dai atletis a àn gjoldût di une vore di atenzion di bande dal public. Une robe simil e vignarà fûr, simpri intal centri comerciâl di Torean, in Istât. Intal prin fin di setemane dal mês di Avost e je metude in calendari une riunion a Grau, su la roste vecje, cu la colaborazion dal Municipi de “Isule dal Soreli”.
◆ Un sium di Leonardo Zalateu al è chel di meti sù une manifestazion di pugjilât inte vecje Place dai Grans, a Udin, chê che cumò si clame place XX Settembre. Di vuelin, si varès di rivâ a fâle forsit prin dal Istât o fûr pai mês plui cjalts dal an.
◆ E daspò di dut, come simpri, intal mês di Novembar al sarà il timp dal classic “Memorial Mario Vecchiatto”, une manifestazion rivade chest an ae edizion numar 34.
◆ Insume, cul impegnâsi pai events, cul lavôr di ogni dì in palestre, cu la partecipazion di diviers atletis aes Finâls nazionâls e cun ducj i torneus ator pe Italie, la ativitât de Pugjilistiche Udinese no si ferme mai. ❚
