Une racuelte di fonts par un bust dedicât a Rodolfo Lipizer

In ocasion dai cincuante agns de disparide dal mestri Rodolfo Lipizer, il concors internazionâl dedicât al violin che i è stât dedicât al à inviât une racuelte di fonts par fâ sù un so bust di meti intai zardins publics di Gurize, opare che e vignarà realizade dal artist incisôr Franco Dugo. Sul sît internet www.lipizer.it si puedin cjatâ dutis lis informazions e cetancj altris contignûts interessants, sedi su la associazion promotore de iniziative e dal concors, sedi su la figure dal musicist gurizan.
◆ Chest an e cole la 43e edizion dal concors violinistic internazionâl, une competizion une vore preseade, tra chês plui impuartantis a nivel european, e al ven di dî mondiâl, parcè che i concorints a vegnin pardabon di ogni bande dal mont.
◆ Tal 2002 e jere vignude fûr une cuistion intrigose pal fat che il concors al veve escludût trê violinistis russis, par vie de vuere in Ucraine, une sielte cetant discutude che e cor ta chel brut agâr de “culture de cancelazion”. Plui tart si voleve tornâ a ametilis, ma il tacon al è stât piês che no la buse.
◆ Di fat, in cheste gnove edizion, che si tignarà dai 7 ai 15 di Setembar a Gurize tal Teatri “Lojze Bratuž”, al è scrit a clâr che a puedin partecipâ violiniscj di cualsisedi nazionalitât nassûts dopo dai 15 di Setembar dal 1991. A son in bal trê provis che a saran judicadis di une comission componude di Mario Garuti tant che president, Galina Buinovschi, Carlo Grandi, Cristoph Seybold e Bukar Sykja tant che zurâts. Sul canâl YouTube “Lipizer2024” si podaran seguî dutis lis provis e Radio Rai al trasmetarà il “Conciert dai laureâts”. Lis diviersis fasis, tra eliminatoriis, semifinâl e finâl, a previodin la esecuzion di tocs musicâi tra i plui rapresentatîfs dal Baroc ae ete contemporanie de leterature violinistiche.
◆ Lant ai premis, il prin classificât al vinçarà dîs mil euros e un violin donât dal Istitût di Istruzion Superiôr – Scuele Internazionâl di liutarie “Antonio Stradivari” di Cremone, oltri a jessi ingaiât par concierts ator pe Italie. Al secont concorint classificât a saran destinâts cinc mil euros, al tierç trê mil e altris premis in bêçs a calâ, fint al sest in classifiche. Cun di plui, a son altris premis speciâi pai meritevui des diviersis provis.
◆ Al è un concors storic, tra i plui datâts dal Friûl in fat di musiche classiche, che al à viert la strade a altris plui resints, tra chescj ancje chel, propit dedicât al violin, che si fâs a San Vît dal Tiliment e destinât ai fruts portents dai 9 ai 13 agns. Chest concors al à non “Piccolo violino magico”, e al è organizât di bande de Academie di Arcs Arrigoni. Rodolfo Lipizer al à pardabon fat scuele. ❚