Une resistence dute feminine: lis puartadoris de Prime vuere mondiâl

Di dute la sdrume di casermis tiradis sù in Italie, une sole e puartave il non di une femine: chê di Paluce, intitulade ae figure di Maria Plozner Mentil. La struture, fate sù intal 1955 ma aromai abandonade di agns, e je stade butade jù intal 2016. Il ricuart di cheste zovine (e veve 32 agns cuant che e je muarte), par fortune, no si è sfantât intal fum de demolizion, stant che plui di cualchidun di voaltris le varà vude iniment lant sù di Promôs fin in Avostanis, passant dongje dal cret li che si cjate la targhe che e ricuarde il so sassinament. Cun di plui, i è stât dedicât ancje un bloc di piere intal parc Plozner a Sabaudie (intal Lazi) e, al è clâr, il so non al è il prin a jessi ricuardât sot dal monument talian aes puartadoris cjargnelis a Tamau.
◆ Adun cun Maria Plozner Mentil, che e paià cu la vite il so servizi, vie pe prime vuere mondiâl a forin pardabon tantis lis feminis che si cjaparin sù il pês dal conflit su lis spalis, par puartâ provisions e un fregul di umanitât ai soldâts impegnâts a difindi il front talian.
◆ Ae domande strassomeade dal esercit a rispuinderin di dute la Cjargne, ma ancje dal Cjanâl dal Fier e de Valcjanâl, cun scuasit 1500 schenis prontis a scanâsi par judâ lis trupis intes trinceis sui crets des monts furlanis. Cualchidune e jere pôc plui di une frute, cualchidune une none za indevant cui agns, la plui part e jere mari. Feminis dai 16 ai 60 agns, buinis di cjaminâ di un scûr a di chel altri sot dal pês di zeis che a podevin rivâ a passâ i 40 chilos, cu lis braçadoriis che, no cate i sacs di jute, a sgjavavin te cjar fin a rivâ tal vues.
◆ Sgrimie dute feminine, di int di mont usade a patî cence vaîsi intor, cuntune resistence plui grande di chê dai mus (che par altri no varessin rivât a lâ sù par tancj di chei trois che invezit si usarin a fâ ogni dì lis puartadoris), par une imprese cuotidiane puartade indevant par passe 2 agns e che e podeve rivâ ancje a plui di 1000 metris di disnivel. Une volte a cjase, li che ben pocjis a podevin gjoldisi il padin di un bagn cjalt, lis spietavin i lavôrs tai cjamps, o in cjase, lis fameis, cui fruts che a fricavin scaturîts e i malâts di viodi.
◆ Une presince che e deventà une costance e un confuart pai tancj soldâts mandâts a murî lontan di cjase e che, magari ancje dome par un marilamp, intal viodilis a tornavin a vê devant dai voi lis fantasimis de esistence di une volte, prime che il maçalizi inutil ju glotès intal so gargat.
◆ La considerazion che i reparts militârs a vevin di chestis feminis si slargjave ancje di là dal confin, di dulà che il nemì al cjalave cun fote ma ancje cun amirazion chestis “Trägerin”, puartadoris, pal apont, che a finirin par jessi consideradis tant che un repart di pueste, segnalât cuntune fassute rosse peade intor dal braç, parsore dal vistît. Cheste la “monture” metude sù di chestis figuris straordenariis, che a sielzerin di meti a risi la lôr vite par judâ la Patrie. Une “Patrie” che si è ricuardade di lôr dome ae fin dal Nûfcent, cuant che invezit, par fortune, in gracie dal lavôr di tancj volontaris, a jerin za in vore museus e publicazions par puartâ indevant la lôr memorie.
◆ Il lôr non al è stât cognossût a nivel talian in gracie dal libri “Fiore di roccia” di Ilaria Tuti. Altris publicazions une vore interessantis a son: “Le portatrici carniche” (Costantino De Franceschi e Adriano Gransinigh), “Bucce d’arancia sul fronte di Nord Est” (Claudio Calandra, 2008), “Le donne nella Grande Guerra 1915-18” (Enrico Meliadò e Roberto Rossini, 2017), o ancje “Anìn” (Angela Torri, 2021). ❚