Il Teatri Stabil Furlan e la prime part de gnove Stagjon Teatrâl
A sonv tancj i apontaments chest an in regjon dedicâts a Pier Paolo Pasolini. I cent agns de sô nassite e lis diretivis dadis dai bants regjonâi pe culture – li che a jerin plui pussibilitâts di otignî finanziament se si tignive cont, intes variis programazions, di iniziativis leadis al poete – a àn creât une sorte di inflazion. Tantis lis propuestis, di ogni fate, pensadis intor di un inteletuâl che tai timps de sô zoventût in Friûl nol è stât in vêr tant capît e acetât. Cumò invezit, e nol è dit che al seti un mâl, cuasi no si pues fâ cence di lui e, dilunc dal calendari dal 2022, no si contin lis ativitâts fatis e di fâ sul so cont, daûr des plui variis declinazions.
◆ Chê dal teatri di sene e je forsit la forme mancul frecuentade, numerosis invezit lis convignis, lis leturis, lis musichis, lis retrospetivis leadis al cine. Benon: ancje il Teatri Stabil Furlan, tal prin toc de sô gnove Stagjon teatrâl presentade il mês passât, al à pensât – forsit ma no dome daûr des indicazions dai bants culture – di dedicâ un spazi a Pasolini, chel dal teatri, rivant adore a jessi fûr dai binaris dal bielzà dit, viodût e sintût. Al à fat riferiment duncje al teatri pasolinian, chel dai agns de “Academiuta di lenga furlana”, pôc o par nuie frecuentât tal glimuç des tantis iniziativis; ma no dome: al à ancje produsût alc di origjinâl, comprendude une prime assolude che e vignarà presentade dentri de Stagjon 2022-2023.
◆ Lant pal ordin, tant al è plasût cuant che al è stât presentât ai Colonos di Vilecjaze di Listize: a vierzi il gnûf cartelon e je stade, il prin di Otubar tal Zardin di Palaç Morpurgo a Udin, “La morteane / part dal fantat”. Si trate di une opare gjavade di un test pierdût dal poete di Cjasarse che, midiant di Massimo Somaglino, diretôr artistic dal Teatri Stabil Furlan e curadôr dal spetacul, e à cjatât une gnove vite. La comedie intun sôl at, come che al scrîf Pasolini intune letare a Gianfranco D’Aronco tal 1945, e veve di jessi rapresentade de compagnie de piçule academie, ma no si sa parcè chest nol è sucedût. Il manuscrit çomp che al è stât cjatât al à dentri dome lis batudis dal protagonist, o ben “il fantat”, interpretât di Klaus Martini. Somaglino, cuntun colp di mestri, al à rivât a dâ la vôs ai personaçs che a mancjavin (“il Diaul”, “l’Anzulut”, “il Muart”), afidant musichis e coreografiis in lûc des peraulis, graciis ae creativitât de compagnie di danze contemporanie Arearea e di un grup di musiciscj che a àn creât musichis origjinâls: Mirko Cisilino, Giorgio Parisi, Laura Giavon. Il risultât al è stât alc di insolit e mai viodût prime, ce che al merete di jessi fat par memoreâ pardabon un artist e inteletuâl fûr dal ordenari.
◆ Chel altri spetacul in program al è une prime rapresentazion assolude, che no si pues mancjâ di viodi, in sene joibe ai 3 di Novembar tal Teatri Gnûf Giovanni da Udine. Si intitule “Se vivrò dovrò pur tornare (Ritorno all’età del Pane)”, produsût dal Teatri Stabil Furlan insiemi cu la SOMSI, Societât Operarie di Mutui Socors e Istruzion di Pordenon, e in colaborazion cul Centri Studis Pier Paolo Pasolini di Cjasarse. La dramaturgjie e je di Tarcisio Mizzau, Lisa Moras e Carlo Tolazzi, lis musichis origjinâls di Renato Miani, lis senis di Claudio Mezzelani, cui atôrs Giulia Cosolo, Serena Di Blasio, Alessandro Maione e Carla Manzon. Il titul de opare al cjape ispirazion di une letare di Pasolini a Novella Cantarutti dai 17 di Novembar dal 1954, indulà che al scrîf, voltât par furlan: «Devant dal Friûl al dovarès scomençâ dut dal inizi e, a pensâ, alc mi cjape il gargat: un sens insiemi di muart e di vite». Il spetacul al vûl duncje lâ a fonts dal so amôr pal Friûl, in ducj i sens, e ricomponi chel periodi crestôs dal autonomisim furlan che al cjate ereditât in figuris tant che Tiziano Tessitori, Pre Bepo Marchet, Gianfranco D’Aronco e il stes Pasolini.
◆ Trê feminis di trê gjenerazions diferentis si scuintrin e si incuintrin, fra partî, ripartî e tornâ dongje, cirint il sens atuâl di une apartignince e di une identitât che vuê e somee jessi une riconcuiste necessarie pes gnovis gjenerazions, dopo decenis di sviliment des piçulis Patriis, di ogni sens di comunitât e di globalisim gjeneric e impuarît. Intun spazi insiemi reâl e de memorie, lis musichis origjinâls a fasin riferiment a materiâi de musiche popolâr e di bal des epochis che a traviersin cheste liende apassionante. Fuartis lis domandis: ce isal restât di chel slanç culturâl e identitari? Ce rapuarts àno i furlans cul Friûl di vuê? Ce vuelial dî partî, tornâ, apartignî, restâ, in chest tierç mileni?
◆ A sierâ il cercli di cheste trilogjie pasoliniane che il Teatri Stabil Furlan i dediche inte prime part de sô seconde Stagjon teatrâl, e interven “Rosada!”, altre produzion dal ent di teatri par furlan in colaborazion cun ARLeF e Mittelfest 2022, indulà che e à debutât. La dramaturghe e regjiste Gioia Battista e à ideât un spetacul tra peraule e cjançon indulà che la vene des “Poesiis a Ciasarsa” si sglonfe inte volontât di cjatâ un leam tra la peraule stesse e la sô necessitât di jessi tramandade, par salvâle, resonant sui confins tra lenghe e tiere. Un spetacul tant plasût a Cividât, cun Nicola Ciaffoni, Elsa Martin, lis musichis di Giulio Ragno Favero e la consulence di Flavio Santi.
◆ Dutis lis informazions sui spetacui, i biliets e i abonaments a son sul sît www.teatristabilfurlan.it (pueste eletroniche: info@teatristabilfurlan.it; tel: 392 3273719). La bilietarie e je li dal CSS Teatri Palamostre (di lunis a sabide, des 17.30 aes 19.30. tel: 0432 50692; pueste eletroniche: biglietteria@cssudine.it), e ancje tes sedis dai spetacui, une ore prime dal inizi dal event. I inzornaments e dutis lis novitâts si cjatin ancje su Facebook e Instagram dal Teatri Stabil Furlan. ❚
