Une vie furlane par frontâ la imigrazion

Il Friûl, cussì braurôs dai siei emigrants, al à di un pieç mudade piel e al è al centri di une gnove imigrazion, propit intant che i siei fîs a stan tornant a partî intal forest, no plui cuntune sporte peade cul spali, ma cun laureis e computers. In cheste fin di Istât, o sin di front al paradòs di une tiere cressude a pan e formadi, sburtant centenârs di miârs di siei citadins a cirî fortune inaltrò, che e finìs par vê une vore di dificoltâts a fâ madressi une rispueste organiche ae ondade migratorie di int che e ven di Soreli Jevât. Une part dal mont dulà che lis crisis internazionâls (Afghanistan, Sirie, Egjit, Sud Sudan) si zontin a une situazion endemiche di puaretât. Chescj puescj vuê a son il Sud dal Mont, come che nô o jerin il Sud dal Nord cuant che i Cosulich a armavin ogni setemane piroscafs plens di int che a partivin di Triest pes Americhis tal prin Nûfcent.
Vuê i traficants di oms a son plui spietâts e ‘sâfs di bêçs: e dutis lis rotis a van ben par vuadagnâ e indreçâ tal siôr Ocident (che no si sa ancjemò par trop che al varà il benstâ di cumò) miârs di disperâts e tancj che, par indole o par maluserie, a finissin ancje par fâ i delincuents. Il probleme, dut câs, al sta intal mani: se la Italie e je la puarte de Union Europeane e lis sôs cuestis (vot mil chilometris) a vegnin cjapadis tant che pont di bordament privilegjât, no ducj invezit si inacuarzin che ancje “il nestri Friûl al è il puarton di tiere par dulà che e jentre la plui part di chei che a domandin asîl ma ancje dai clandestins presints sul teritori talian”. Peraulis di Antonella Nonino, assessore al Comun di Udin che e à scugnût cjapâsi caric in plen Avost di un câs che al spiçave une vore: dîs afgans che a domandavin asîl, fers su lis bancjutis dal Parc Moretti in spiete che la Cuesture di Udin ur cjatàs un domicili par distrigâ la lôr pratiche di acet politic. Si trate di fat di une zone di vuere e chei che a scjampin di chestis zonis a son tutelâts dal dirit internazionâl: dome che il Stât talian par identificâju e acetâ la lôr richieste al met di 12 a 18 mês, une eternitât rispiet ae Anglie che in 15 dîs di solit e dîs “yes” o “no” a chei che a rivin sul so teritori cun cheste necessitât.
I furlans cul pedigree a àn stuarzût il nâs: “une tendopoli di profughis tal plen centri de citât no pâr bon”, e à pandût par prime Giuliana Pozzo che cu la sô fondazion “Udinese per la Vita” e veve invistît su chel parc. Normâl par une realtât come Udin dulà che par un mês i gjornâi a àn fevelât dome de idee di meti ae puarte i mendics, clamâts “accattoni” cun tiermin pasolinian che dut câs nol mude la sostance. Ma la cuistion, che dopo cualchi dì si è inviade a soluzion in gracie de sinergjie di Caritas, Comun e Cuesture, e je ancjemò plui grivie cuant che si fevele dal Cie, il Centri di Identificazion e Espulsion che a Gradiscje al ten 64 forescj, soredut magrebins. E no gnûfs rivâts, ma pe plui part int cul permès scjadût o personis che a àn scontât penis detentivis in preson e no àn lis cjartis in regule par jessi rimandadis tai lôr paîs parcè che i lôr consolâts no ju identifichin.
Chel che tancj furlans a pensin e a disin di cheste int, dispès al mostre pocje memorie de storie des lôr stessis fameis che a àn vût par sigûr plui di cualchi om o femine ator pal mont a vuadagnâsi di vivi. Invezit, bisugnarès cirî di fâ capî ancje al Stât talian – che in materie di imigrazion al à une politiche une vore ineficiente – che i timps par dâ un judizi rispiet a cui che al domande asîl o par mandâ vie cui che nol à titul, a puedin jessi une vore plui curts, ma ancje che no à di mancjâ mai la umanitât che un om di glesie tant che David Maria Turoldo al à simpri domandât di vê “par cualsisedi olme di Diu che si strissine fra cîl e tiere”.
In cheste fase però, come che al sosten Pape Francesc – il prin “Pape migrant” – “e je in vore la globalizazion de indiference”. Propit cuant che “la necessitât di frontâ une emergjence umanitarie cussì grande – al à dit Luîs Glovaz, diretôr de Caritas – e domandarès invezit une plene assunzion di responsabilitât”. Chest nol vûl dî taponâsi i voi, nancje pai predis che a operin in chest setôr: ancje se don Pierluigi Di Piazza al scaturìs al pinsîr che “Udin al podedi lâ in crisi par dîs personis che a domandin acet, di front a un esodi biblic come che al è in at in chest mont”.
La situazion, dut câs, e je critiche e intune societât madure lis istituzions, adun cui volontaris, a ricognossin i problemis e ju afrontin. “Se la prevision dal Alt Comissariât des Nazions Unidis pai Rifugjâts – e dîs Nonino – e je di un milion di profughis dome l’an che al ven de aree mediorientâl, o varessin di prontâsi e di capî che dâ acet in maniere struturade a cheste int nol è un at di debilece boniste, ma al è anzit une forme di realisim. E i furlans, che a son int pragmatiche, a varessin di capîlu ben”. Risolvi un probleme invezit di platâlu, al varès di jessi il nestri sproc in ducj i setôrs, ma dispès ancje noaltris o vin la tindince “taliane” a pensâ che i nestris fastidis si risolvaran “di bessôi”. Ma nol è cussì. Par nissun. ❚
Walter Tomada