VG ogni dì e dapardut par scjafoiâ il Friûl Orientâl

Ogni mês si fâs la lune, ogni dì si invente une. O ben, par jessi plui precîs, ognì dì si va dilunc cun chê stesse invenzion. Di ce fevelìno? Di chê nozion fantagjeografiche taliane che chest an e finìs 160 agns, par vie che e saltave fûr pe prime volte intun articul “programatic” dal Istât dal 1863, e che la sô vite “concrete” – si fâs par mût di dî… – e à sù par jù cent agns, stant che e je stade sburtade cun fuarce tacant di chei cu la fassine e cul manarin: ven a dî «le Venezie», in gjenerâl, e «la Venezia Giulia», in particolâr.
◆ De Cjamare di Cumierç ae Bancje di Credit Cooperatîf, passant pal Consorzi di Bonifiche e pes etichetis dal vin, chê seconde denominazion e va dilunc a scjafoiâ il Friûl Gurizan, dineant la sô specificitât e la sô identitât plurâl. Si lu à viodût a clâr ancje intal program de edizion di chest an di èStoria, che si à davuelte a Gurize dai 22 ai 28 di Mai stâts, cun diviers incuintris dulà che lis definizions inventadis di Graziadio Isaia Ascoli a son stadis protagonistis cun dute chê «preziosa ambiguità», che ur veve ricognossude in maniere “strategjiche” il lôr inventôr. Cundut achel, propit inte suaze di èStoria al è saltât fûr, in maniere interessante, ancje alc di Friûl e di furlan. Che e sedi ancje chê une forme di ambiguitât preseose? ❚