Viers la Cunvigne dai Comuns furlans: dentri ancje Gurize. E te Basse si fâs indevant un gnûf Referendum

A van indevant cun fuarce lis adesions ae gnove Assemblee des Comunitâts Linguistichis. A son zaromai 50 i Comuns che a àn sielzude la partecipazion a chest gnûf imprest di confront e di discussion che al podarà jessi il Consei dulà che i furlans a podaran fevelâ de lôr autonomie, dai interès de lôr tiere e dai mieçs par difindiju inte miôr des manieris. Chest impuartant lûc di aprofondiment culturâl e politic al è previodût de gnove leç sul riordenament dai ents locâi. E al è il risultât di un emendament nassût propit di un grum di sindics, chei dal “Laboratori di Autonomie” che a son un esempli de dibisugne di fâ cressi dal bas esperiencis di riflession e di autoguvier. Cheste necessitât e je cussì trasversâl che cumò i sindics che a son partîts, che a jerin dome in 16, si cjatin in 50 e che inte patulie di chei che a vuelin confrontâsi par decidi cemût puartâ indevant l’interès de comunitât furlane a son ancje doi nons une vore “di pês” tant che il sindic di Udin Furio Honsell e chel di Gurize Ettore Romoli. Un di çampe e un di drete: a dimostrazion che cuant che si fevele di autonomie nol è il colôr politic che al conte, ma la storie dai nestris paîs e il concet di fonde che al è simpri miôr decidi di bessôi e cjapâ in man il nestri destin invezit di spietâ che altris a fasin il nestri ben.
I TIERMINS A SON SPROLUNGJÂTS
Il biel al è che no je ancjemò finide achì: “O vin mandade une mail a ducj chei che o vin podût par visâ che par aderî al è ancjemò plui timp – al spieghe Diego Navarria, sindic dal Comun di Cjarlins, che cul coleghe di Merêt Massimo Moretuzzo al coordene i sindics dal Laboratori di Autonomie – parcè che a son stâts sprolungjâts i tiermins par aprovâ i belançs. Plui o sin e miôr al sarà. Al sarès un segnâl politic dret, fuart, e in curt la Assemblee e varès une funzion no dome decorative, ma pardabon consultive. Pal guvier regjonâl e talian al coventarà sintî la nestre opinion par chel che al inten lis decisions sul nestri teritori. Nô o sin lâts indevant e se chei altris dopo a son vignûts daûr al vûl dî che la nestre azion politiche e leve inte direzion juste”.
PORDENON IN SPIETE
Dal rest, il grup di chescj sindics nol è mai stât sierât, anzit si è simpri viert ae plui plene condivision: e al spere che la rêt dai sindics si slargji ancjemò, e che si rivi a meti dongje ancje Pordenon dulà che la citât no à cjapade nissune decision sul teme, ingredeade par cumò intal fâ cuadrâ i belançs spolpâts dai tais dal guvier. Un destin come chel di tancj altris Comuns che si cjatin ingolfâts inte aprovazion dai documents contabii. Ma, come za dit, a son almancul 50 chei municipis che in dute cheste baraonde di delibaris peadis aes financis comunâls, si son visâts di inserî tal dibatiment dai lôr conseis la cuistion de adesion ae Assemblee. E ducj a àn dit di sì.
UN GNÛF REFERENDUM
Intant, ancje un gnûf front si môf dal bas (e in chest câs ancje de Basse); al è chel che al ven indevant di Rivignan e Teôr, comuns dulà che il sindic Mario Anzil al sta metint dongje une iniziative provocatorie ma no masse: cjapâ sù lis firmis par un referendum che al ledi a istituî lis provinciis autonomis di Friûl e Triest. Ven a stâi, lâ ae lidrîs dal mâl di cheste Regjon mâl nassude e fruçâle in dôs realtâts autonomis e autosuficientis. “Al è l’ultin tren par chei che ur interesse salvâ la nestre specialitât”, al dîs Anzil che al ponte a rivâ a 15mil firmis par sburtâ un referendum propositîf, che al è previodût tant che imprest a nivel regjonâl e che al podarès jessi un util veicul “par jessî de cjacare sterile e de proteste di ostarie, e passâ ae azion par difindi la nestre int e la nestre tiere”. ❚
Walter Tomada