VIERTIDURE. E je ore di cambiâ il pat sociâl o il Stât

Interviste a Fidrì Simeoni dal Front Furlan, moviment politic indipendentist

Nus è capitât cualchi volte di viodi ator cualchi segn de vuestre presince (manifescj, adesîfs, volantins), ma se un us domandàs sclet cui che o sês e ce che o fasês, ce rispuindaressiso?
Front Furlan nol è un partît ma un moviment politic che no si ricognòs ni te diestre ni te çampe, ma dome tal so jessi un moviment di rapresentance par chei che si sintin prin di dut furlans. Par chel, e je une struture vierte a ducj chei che a son nassûts o che a àn sielzût di vivi in cheste tiere e che a vuelin miorâ la cualitât de vite, no dome materiâl ma ancje morâl dal Friûl. Nô no sin tant un moviment di filosofie e di peraulis, ma un grup di militance ative. L’obietîf primari al è chel di otignî la autodeterminazion de Patrie e di dutis li sôs comunitâts: rinegoziâ la presince dal Stât e otignî dutis lis deleghis, prin di dut chês fiscâls, e aministrâsi par cont nestri.
Sui vuestris volantins di denuncie si fâs il pêl al pulç, ma voaltris cemût si finanziaiso?
Nô si autofinanzìn al 100%. Lis jentradis a rivin prin di dut des donazions e dal tesserament, de vendite di cualchi gadget, e nus jude ancje le cuote che mensilmentri a versin i nestris elets. No vin altris jentradis fûr di chestis.
Di resint, un vuestri comunicât al è rivât a tantis clapis culturâls e associazions di chenti. Un comunicât politic che al propon une colaborazion. Parcè chest slargjâ?
Se i moviments e i comitâts a van indenant a lavorâ sparniçâts no je pussibilitât di rivâ a fâ nuie e si inçopedin un cul altri ancje tai piçui obietîfs di ogni dì. Nô o proponìn une struture indulà che ducj si cjatin ogni tant par scambiâsi informazions, esperiencis e par judâsi. L’obietîf al è meti sù une fuarce politiche indipendente, un sindacât teritoriâl par dutis lis comunitâts de Patrie dal Friûl.
Si sin mots parcè che ducj a spietavin che cualchidun al fasès il prin pas, e nô no sin int che e à pôre di meti la muse.
Tal incipit dal vuestri comunicât si lei clarementri che voaltris o poiais une posizion plui indipendentistiche che autonomistiche: puedistu sclarî miôr chest pont?
Il concet al è une vore sempliç. Cuant che si fevele di autonomie, si fevele di domandâi al Stât di rinunciâ a alc par dâlu al teritori. La indipendence invezit e partìs di un supuest difarent che al è chel dai dirits naturâi e inalienabii di un popul che al pretint di difindi e di tignîsi chestis sôs prerogativis.
Nô no volìn domandâi par plasê al stât che nus lassi i bêçs che i nestris lavoradôrs a produsin e che a vegnin puartâts vie in tassis. Nô o pretindìn che al vegni ricognossût che cheste ricjece e nas de nestre int e che jê e à di decidi là che a àn di lâ i prodots di tante fature. Il pat sociâl che al tignive in pîts la Italie al è rot: cuant che un stât al puarte vie plui dai servizis che al garantìs, e je ore di cambiâ o il pat sociâl o il stât.
Il 2013 e lis elezions regjonâls a son, clarementri, l’obietîf plui imediât. Cemût viodêso in chest moment la situazion politiche regjonâl?
Le viodìn tant mâl, ancje parcè che e je il spieli de decjadence taliane. Al è dut in man ai partîts che aromai si preocupin massime di cjapâ sù des nestris sachetis ce che ur covente a fâ sorevivi lis lôr struturis spropositadis e lis mil bocjis des lôr clientelis eletorâls. E par fâ chest, cence nissune distinzion, a àn dade prove di vendi la nestre tiere e scancelâ la nestre autonomie pûr di lassâ azion libare a grups economics e interès di ogni gjenar che a vegnin di fûr dal Friûl par sfrutâ tiere e int.

Pes elezions aministrativis che a son su la puarte, pensaiso di fâ alc?
Sì, ancje se la framentazion e la confusion che o stin viodint ator a riscjin di slontanâ la int ancje de rapresentance politiche locâl. O vin i fiers in aghe a Cervignan là che si presentìn cuntune liste autonomiste metude in pîts di nô. A Buie o darìn la poie ae liste storiche de autonomie locâl, di chês altris bandis o viodarìn se lis nestris ideis a cjatin cjase o pûr no. Nus displâs che ancje par chest zîr si resonedi dome par listis civichis, ma l’obietîf di gjavâ vie lis segretariis dai partîts al sarès za un bon risultât.
Agns fa, pre Bepo Marchet al disè: “mi alearès cun cualsisedi fuarce politiche, mancul che cui fassiscj”. Voaltris, cun cui no volaressiso vê a ce fâ?
Ricognossi i fassiscj in dì di vuê al è un pôc dificil, ancje parcè che cun ducj i zîrs di valzer che si viodin ator no si capìs plui se a son mai stâts pardabon fassiscj o dome gramule di fassiscj… Dit chest però, mi sint di dî che chei che a àn esprimût posizions centralistis e antifurlanis al è miôr che a stedin lontans.
Jentrìn un pôc miôr tal vuestri program. Za tal manifest dal Moviment Friûl dal 1968 si fevelave di servitûts militârs: podaressiso, in struc, dînus cemût che o rivaressis a rinegoziâlis?
Ancje chi e je dome une cuistion di mentalitât, là che ai furlans fin cumò si è fat crodi che a son inferiôrs a chei altris e che dut ce che al ven di fûr al è bon. Bon di ce? Par agns nus àn costruît une economie false, e cuant che a son lâts vie i alpins e l’esercit, paîs intîrs a son muarts. A Davian, i americans a spindin i dolars dentri te base, e a Rivolt i rimbors pai dams no rivin mai. In Gjermanie e in Sardegne a son rivâts a mandâ vie i americans, dome par une cuistion di opinion publiche e di pression sociâl. No crôt che in fonts i furlans a sedin tant diferents di todescs e sarts. Ur mancje dome la rapresentance politiche.
Al pont 6 dal vuestri document, si fevele di difese des lidrîs storichis di cheste nestre tiere. A mi però, mi è parût contraditori lei i vuestris documents publics dome in lenghe taliane. Si puedial difindi une peculiaritât linguistiche cence doprâ la leghe che si vûl mantignî vive?
Chi e je dome une cuistion di mieçs, ancje parcè che ce che si rive si lu fâs ancje par furlan. Il probleme al è che no vin avonde risorsis, prin umanis e dopo economichis, par rivâ a tignî in pîts la comunicazion che e varès di jessi bilengâl. Se o rivarìn a cressi chel tant di vê il personâl par voltâ in simultanie e i fonts par tornâ a fa il sît internet in dople version (e dople spese), lu fasarìn a colp.
Fin cumò, la sielte e je stade se rivolzisi dome a chei che a lein il furlan o a ducj. O vin avonde umiltât par ricognossi che, piçui come che o sin, o vin bisugne di fâsi capî di ducj. ■
Mauro Della Schiava