VIERZIDURE – Furlan a scuele, finalmentri… o forsit?

Un sium che al devente realtât o salacor dome une puare inlusion? A sintî i sorestants de nestre Regjon, di cumò indevant il furlan al podarà jentrâ intes nestris scuelis no di scuindon, come che al è stât fin cumò, ma dal puarton principâl e in maniere dal dut legjitime. Lu dîs l’assessôr ae istruzion e formazion de Regjon Friûl Vignesie Julie Roberto Molinaro intal presentâ l’imprest legjislatîf che al covente di plui par dâ dignitât di materie di studi e di metodi didatic a une lenghe che fin cumò la scuele taliane e à simpri refudât, se no a peraulis, almancul tai fats. Si trate dal Regolament pe atuazion de leç regjonâl 29/2007 inte part che e inten la sô aplicazion intes scuelis di ducj i ordins. Difat la leç e previôt la pussibilitât, fin cumò une vore limitade, di insegnâ la marilenghe e in marilenghe ancje tes scuelis superiôrs, in particolâr al Liceu.
I CONTIGNÛTS DAL REGOLAMENT_Ma anìn par ordin e viodìn ce che al previôt chest impuartant document fat bon in vie preliminâr de zonte regjonâl. Intant si fâs bon il principi che la lenghe e va insegnade des maternis fin a dut il cicli de istruzion. O stin fevelant (purtrop) di fruçôns, 30 oris di insegnament di furlan par an tes maternis, elementârs e mediis: ancje mancul (20 oris par an) aes superiôrs, dulà che fin cumò dut câs il furlan al podeve jentrâ dome in progjets sperimentâi come il CLIL, l’insegnament di un modul didatic doprant la marilenghe come veicolâr. A ben viodi, duncje, si tratarès di un inviament une vore significatîf pe dignitât di materie curicolâr che al regalarès ae marilenghe.
NO DOME SCUELE_ Une grande novitât e je ancje chê che la sielte dal insegnament dal furlan e vignarà fate dome une volte, al moment de prime iscrizion dal frut a scuele: nol coventarà plui tornâ ogni an a pandi la voie di fâ studia la marilenghe ai nestris fruts, e cheste e je pardabon une concuiste.
Impuartant al è il fat che il regolament prontât de zonte no si ferme ae scuele, ma al va ancje a cirî di stiçâ lis fameis cun iniziativis di sensibilizazion e al previôt la realizazion di cors di furlan vierts a ducj, ancje ai forescj imigrâts: la marilenghe e po jessi difat une buine clâf di integrazion par cui che al à voie e timp di imparâle. A prontâ chescj cors a saran la Universitât, i ents di formazion e ancje lis scuelis che cussì a podaran meti in vore ancje cui grancj i procès didatics metûts in vore cui piçui.
UNE STADE INMÒ LUNGJE_ Buinis gnovis, alore? Sigûr si trate di un pas indevant ma no je par nuie finide la bataie e la strade e je ancjemò lungje. No crodìn di fâ il malvoli a dî che e sarà dure rivâ dapît de cuistion pal an di scuele avignî. No nus mancjin lis sperancis: ma inte lungje storie dai tentatîfs di viodi jentrâ il furlan tes scuelis a ‘ndi vIn sintudis ancje masse di promessis: Miôr cjalâ ben no dome ce che al è stât anunciât ma ancje ce che al ven realmentri indevant. In chest câs al è ancjemò plui scûr che lusôr su la materie, sedi dal pont di viste de forme che di chel de sostance.
I PROSSIMS OSTACUI_ Prin di dut, il regolament fat bon de zonte al è dome al inizi dal so viaç: prin di dut al à di passâ al tamês de VI Commission dal Consei Regjonâl dulà che al sarà par sigûr sledrosât come un cjalçut dal conseîr triestin Piero Camber (Pdl), il plui incagnît dai mastins antifurlans che a stan sentâts su lis cjadreis dal Palaç di Plaçâl Oberdan. Daspò i tocjarà ai sindacâts dî se al va ben soredut il teme dal reclutament dal personâl abilitât e il fat di cemût che al varà di jessi paiât: e si sa che prin di fâji gloti ae “Triplice” che si à di Gambiâ alc te scuele, a coventin i timps di MatusalEm. Ancje la sostance dal Regolament dut câs e je plene di fum. Prin di dut, cui lu insegnaraial chest furlan? La Regjon e fevele di une selezion par “titui individuâts dal Ufici Scolastic Regjonâl”: ma di ce titui fevelino, se fin cumò cui cors di perfezionament pe didatiche par furlan si podeve netâsi … il paviment! E soredut, cun ce bêçs si paiaraial chest program? L’Assessorât di Molinaro al fâs buine une stime di 2,6 milions di euro: ven a stâi plui di dut ce che l’intîr Stât talian al garantìs vuê ae tutele des minorancis. Intal regolament al è za previodût che se no saran avonde fonts il finanziament al sarà riservât dome aes maternis e elementârs: bastarà no cjatâ risorsis, e il regolament al restarà li, biel di viodi ma inaplicât te sostance.
Walter Tomada