VIERZIDURE – Isontino? No, Friûl orientâl

Inte societât taliane a soflin a fuart aiars di crisi, che a sburtin il Stât a frontâ il risi di un “default” cirint di sparagnâ, a scomençâ dai siei anei plui debui: Comuns e Provinciis. I prins a vignaran ingrumâts in realtâts plui gruessis, alc che al somee ai vecjos mandaments. Lis secondis invezit a laran probabilmentri a disparî, stant che pal plui la int e stime che no coventin a nuie e che dut câs lis competencis che a àn a podaressin jessi davueltis de Regjon o dai Comuns. In Friûl la partide e je ancjemò plui complicade parcè che la Regjon e à competence primarie in materie istituzionâl: se e volès fâ une leç che e discipline in maniere difarente i siei ents locâi e podarès fâlu.
Il president de zonte regjonâl Renzo Tondo al à mostrât la volontât di vierzi une consultazion su la utilitât des Provinciis, lant a clamâ i citadins de Regjon a votâ intun referendum se tignî o sierâ chescj ents intermedis. Ma zaromai intant che il Guvier al discuteve de manovre economiche cu la idee di sierâ lis Provinciis sot dai 300 mil abitants, su la gnove configurazion teritoriâl si è daurman impiade la polemiche. La possibilitât di tornâ a disegnâ il cuadri istituzionâl de Regjon e à sbrenât la fantasie sedi dai autonomiscj nostrans che dai triestin, ducj concentrâts su la discussion dal avignî di Gurize e de sô Provincie. Lis diviersis opinions a àn vut bon o trist acet a seconde dai interès politics e economics che a àn tocjât, ma la idee vignude fûr cun plui fuarce e je chê, par sigûr no gnove, di proponi di une bande il Friûl storic e di chê altre bande la aree metropolitane di Triest. Cheste propueste e à subit stiçât reazions. Se un conseîr regjonâl influent tant che Gaetano Valenti, ex sindic dal Pdl, al à mostrât di jessi favorevul ae opzion furlane, tancj altris oms politics a son cuintri.
Il grop plui gruès di disberdeâ dut cas al è simpri chel, ven a stâi chel dal Friûl che al sta di là dal Lusinç. Aial di stâ cun Udin e Pordenon, di bessôl o cun Triest? Interogatîf che al plate une altre domande di fonde. Gurize ise furlane o no? A rispuindi sul argoment cuntune biele ricercje sul teme, su “Sot la Nape” al è stât di resint Lucio Peressi, colone de Societât Filologjiche Furlane ma soredut om di studis che nol lasse nuie al câs e al prejudizi. Al è lui che al pues vuidânus a scrutinâ la vere nature di chest teritori e lis resons che a puartin a dineâle.
Cemût mai isal cussì dificil rivâ a une definizion clare di chest teme? Gurize ise Friûl orientâl o no?
Sigûr che li al è Friûl. Lu mostre in maniere clare no dome la gjeografie, ma ancje la cartografie storiche, ancje se tai ultims agns cheste denominazion e ven simpri plui platade e e finìs par jessi cuasi dismenteade.
E parcè si platie cheste condizion furlane des tieris di là dal Iudri?
Par solit inte storie lis resons par mudâ denominazion a un teritori a son di caratar politic o militâr. Di esemplis a ‘nt vin ancje dongje di nô. La Istrie e stade intun secul prin austriache, po taliane, po jugoslave e cumò i siei abitants a passin par cravuats o slovens. Un robe compagne e je capitade a Gurize, austriache prin, taliane dopo: ma tiermins tant che “giuliana” o “Isontino” no son mai stâts doprâts fintremai che nol è coventât dineâ la partignince furlane di Gurize e dal so teritori dulintor, che a àn clare contiguitât cui cunfradis furlans di cà dal Iudri.
Ise une operazion politiche o dome une semplificazion? Colpe dai sorestants o salacor di noaltris gjornaliscj?
Al po stâi che la superficialitât di tancj che a lavorin cui mieçs di comunicazion e vedi puartât a banalizâ il teme. Dut câs no si po platâsi che chest ûs de lenghe al ven daûr di tancj altris ats che a vuelin consolidâ une Regjon malsestade, artificiâl, dulà che di agnorums al è il dissen di includi Monfalcon inte aree di influence di Triest. Al è un dissen che al cîr di rivâ a chest obietîf scancelant la memorie dal teritori, lant a omologâ lis animis difarentis di cheste Regjon dulà che si è volut ancje gjavâ vie de denominazion uficiâl la liniute che e divideve dôs realtâts come Friûl e Vignesie Julie che no àn cetant di comun di spartîsi. Inte stesse maniere, viodint che i nons a son impuartants par definî lis intenzions di cui che ju dopre, o podìn concludi che platant lis lidris furlanis dal Gurizan si cîr di anestetizâ il cuarp di cheste Provincie.
Si indurmidìs il cuarp par amputâlu miôr?
Che al viodi. I leams storics, culturâi, artistics e etnografics di Gurize cul Friul a son cussì tancj di jemplâ un biel libri come “Cultura friulana del Goriziano” curât di Ferruccio Tassin tal 2003. Baste impensâsi, ancje se no ducj si visin, che la Societât Filologjiche Furlane e fo fondade intal 1919 propit a Gurize, intune citât che – apene deventade taliane – in cheste maniere si dimostrave scune di furlanetât. E a pene finide la Prime Vuere Mondiâl, costade centenârs di miârs di muarts, cheste rivendicazion no jere robe di pôc. Ma ce che al lasse scaturîts al è che plui di cualchidun, platant cheste realtât clare e nete, al à miôr cjalâ aes influencis austriachis: che a son cence altri stadis, ma si son fermadis soredut al contest citadin e burocratic. Ma intes campagnis la maniere di tirâ sù lis cjasis e il sisteme di vite, e soredut la cussience comun de int che e viveve culì a jerin aspiets che no podevin lassâ dubis: chest teritori al jere e si sintive furlan.
Lui al à cirût conferme intes testemoneancis de cartografie. Ce disino lis mapis dal passât?
Gjeografie e cartografie no àn dubis tal includi Gurize tes mapis dal Friûl e la distinzion che a fasin e je chê di “Friûl Venit” e “Friûl Austriac”, o “Friûl Gurizan”. Dut câs, simpri Friûl. E chest al vâl ancje – e simpri – par Monfalcon.
Ce documentazion aial consultât?
Inte biblioteche de Filologjiche e ta chê comunâl di Udin o ai podût cirî fûr e publicâ mapis di un periodi che al va de fin dal ‘800 al 1925. Un periodi interessant, parcè che personis gurizanis di culture e parfin istituzions di là vie no àn platât la lôr denominazion di furlanetât.
Ise une evoluzion tes denominazions?
La prime cjarte e je une mape uficiâl de Cjamare di Cumierç di fin ‘800 che e puarte parsore i progjets des tramviis che a vevin la finalitât di facilitâ i trafics e disvilupâ il teritori. Si fevele culì di Friul austriac. Inte seconde mape, editade de Utet tal 1920, la denominazion di Friûl orientâl e reste e chest al è une vore indicatif. Di chei stes agns e je une mape publicade dal editôr milanês Capello che adiriture e marche par cunfin dal Friûl il Timau. Culì, come ancje intun “Regio Decreto” dal 1925, cul Fassisim al guvier, chest teritori al ven clamât simpri Friul Orientâl.
E la Vignesie Julie di dulà saltie fûr?
E veve di jessi la denominazion taliane slargjade al teritori sloven e istrian che al veve come pont di riferiment di Triest. Viodût che la Seconde Vuere Mondiâl e à çoncjât lis concuistis di Mussolini assegnant chestis tieris ae Jugoslavie di Tito, il Stât talian al à sielzût di mantignî la denominazion “Venezia Giulia” par fâ viodi che Triest al è riferiment di une aree plui vaste de sole citât e dal Cjars dulintor.
Ce avignî alore par Gurize?
La storie e dîs a gno parê in maniere clare e indiscutibil che Gurize e je part dal Friûl. E jo o crôt che cence vê cussience des lidrîs no si ledi di nissune bande. No sai ce che a sielzaran i sorestants de Regjon, ma pensâ al Gurizan separât dal rest dal Friûl al è un cuintrisens storic e gjeografic. E o riten che i citadins dal Friûl orientâl no saressin dacuardi cuntune soluzion che e ledi cuintri de lôr storie e de lôr gjeografie.
Walter Tomada