VIERZIDURE – La leture de Bibie par furlan: svicinâsi ae Peraule di Diu confermant la dignitât de nestre lenghe

«O crôt che si lassarà une olme apassionant e nobilitant». Cussì il delegât dal vescul di Udin ae Culture, pre Alessio Geretti, al cjale ae leture di plante fûr de Biblie par furlan che si davuelzarà te glesie de Puritât a Udin dai 3 ai 9 di Avrîl, d’un continui par siet dîs e sîs gnots.
Cent e cuarante oris dulà che Diu al fevele al Friûl te sô marilenghe.
Pre Geretti, viodial cualchi riscli in cheste iniziative che e je inmaneade cu la contribuzion di cetancj sogjets e di biel principi e à vût un acet ce tant ferbint?
«L’unic probleme che al podarès jessi al è che cheste leture e vegni pleade a un event dome culturâl. Invezit, al è prin di dut un fat di fede: scoltâ la Peraule di Diu, che e à di jessi al centri de nestre vite».
Une Peraule che si scolte par furlan. In sè chest fat ce valôr aial?
«O metìn dute la nestre umanitât e la nestre culture al servizi de Peraule di Diu. Cun di plui, ricuardìnsi che la Biblie e je la opare leterarie plui impuartante de nestre civiltât. Che il furlan al sei doprât par lei alc di cussì nobil e alt al gjave vie cualsisei prejudizi in cont de dignitât di cheste lenghe. Un jutori di fonde pe massime cussience che o vin di vê tant che popul che le fevele».
Ancje parcè che al sarà un event di popul, stant che a conventin 1300 letôrs…
«Juste apont, une ocasion privilegjade par rinfuarcî la cussience di une partignince. Cun di plui e svicinarà ancjemò di plui la int ae Biblie. Tignint cont che, in gracie dai mieçs di comunicazion, la scolte e sarà slargjade ai 3 milions di furlans che a vivin tal mont. O pensi che e sarà une comozion uniche, un altri mût di tornâ a cjase, scoltant lis pagjinis che plui di altris ti fasin sintî a cjase tô».
Ai letôrs, al pâr di capî, si domande soredut di jentrâ tal spirt di ce che a leiaran, plui di jessi preocupâts di savê lei ben par furlan. Isal par chest che il vescul, bonsignôr Andrea Bruno Mazzocato, ju incuintrarà ducj par un moment di riflession spirituâl?
«Si à di rindisi cont di ce che e je la Sacre Scriture e di ce che al significhe leile. Pagjinis che a fevelin di Gjesù Crist dal principi ae fin. Cun di plui, il nestri al à di jessi un impegn par che e vegni lete in dutis lis lenghis dal mont».
Chei che si son metûts in liste a son bielzà tancj, ma ancjemò no avonde. Cemût stiçaressial la partecipazion?
«O crôt che ce che o vin dit fintremai achì al dei bielzà centancj motîfs. Dut câs, chest aveniment al è pal sigûr origjinâl, straordenari. Duncje, un doman si podarà vê la braure di podê dî “o jeri ancje jo” e di contâlu tant che protagoniscj».
Restant in cont di furlan te liturgjie, e mancje ancjemò la aprovazion de Cei dal Messâl in marilenghe. Il vescul al à contât di vê cjapât a pet la cuistion bielzà pocjis zornadis dopo jessi rivât a Udin. Ce sperancis sono di une conclusion positive?
«No son dubis in cont de aprovazion e il “sì” nol è lontan. La Conference episcopâl taliane e intint di procedi cu la aprovazion di plui di une traduzion (ancje chê taliane) rispiet ae gnove version par latin, la “editio tipica”). Il Messâl voltât par furlan al à bielzà tignût cont di cheste version e la nestre vore e je stade plui svelte di altris. Spietìn, duncje, ma come che o ai dit, o sin in vuaite».
Pre Geretti, ducj contents che il Pape ai 7 di Mai al rive a Aquilee. Al reste un pôc di marum par vie che la sô presince al pâr che e sarà dome di une ore.
«I oraris no son ancjemò chei uficiâi. O stin lavorant par che si fermi di plui, magari dôs oris».
Chenti fevelaraial par furlan?
«Sì, cence dubi».
Antonella Lanfrit