Vino ancjemò contadins in Friûl?

A cui la tiere? A cui che le lavore!” e diseve une detule ai timps dai riviei contadins.
◆ E cumò? Simpri plui tiere e ven doprade par altris destinazions che no son la agriculture. Tai plans regoladôrs comunâi i lassin ae agriculture i terens residuâi dopo vê assegnât lis zonis residenziâls, chês comerciâls, chês industriâls, chês pai servizis e vie indenant. Ce che al reste, cence tignî cont dal valôr agronomic dai terens, al è pe coltivazion.
◆ In Friûl o vin une SAU (Superficie Agricule Utilizade) une vore limitade. Mancul di doi mil metris cuadris par abitant. Si rivial a dâ di mangjâ ai furlans cun nancje doi mil metris cuadris di tiere par om? Une volte la aziende contadine, cuntune cincuantine di vacjis, cualchi purcit, il pulinâr cun dindis, gjalinis e cunins, e faseve vivi la famee e e tignive variât ancje il paisaç agrari. Par dâ di mangjâ aes bestiis e coventave diversificâ lis produzions. Blave di ca, vuardi di là, forment e mediche in rotazion, un tic di prât pe mangjadure tai tocs plui lontans, ort te braide daûr di cjase, dôs plantis di vît pal vin e vie indenant. Vuê dome monoculture: forment, blave, soie.
◆ In plui o vin simpri mancul stalis e duncje simpri mancul vacjis, soredut di lat. “Une stale e je une dite serie – al dîs un mût di dî popolâr – no ti da mai un dî di ferie”. Po ben, si podarès dî che se no si va in vacance almancul si vuadagne alc dal pont di viste economic. Ma ce! Un litri di lat al vâl cincuante centesims. Tant di mancul di un gjingjerino! E duncje cui isal chel mat che vuê al ten stale di bestiis? E se i vecjos aromai usâts a fâ chel mistîr a van ancjemò indenant plui par sante scugne che no par sielte, i zovins no si insumiin nancje par nuie di regolâ bestiis e, a pene che a podin, a scjampin in fabriche, in ufici o a fâ i influencers, che vuê al va di mode.
◆ Invezit di stalis, si fasin grancj feedlots come in Texas: arlevaments intensîfs cun miârs e miârs di gjalinis, o di poleçs, o di cunins o di purcits, cence doprâ tiere. Dome mangjinis che cuissà di dulà che a rivin e grandis cuantitâts di ledan che no si sa dulà spandi, cul pericul di incuinament di nitrâts.
◆ Se di no, implants a biomasse par produsi energjie. Par ogni Megawatt a coventin 250 etars di teren agricul destinâts a culturis di butâ dentri ta chescj rumis artificiâi par fâ metan di brusâ par fâ corint. E, se nol bastàs, vuê slambris simpri plui grancj di teritori agricul a vegnin cuvierts di panei fotovoltaics par fâ cuintri al mudament climatic e produsi energjie sostignibile.
◆ E cuant che no varìn a vonde tiere e si sarìn dismenteâts cemût che si fâs agriculture, ce mangjarìno? Pomodoros cinês? Purcits dal Sudameriche e gjalinis africanis? In compens o sarìn campions tal produsi computers, telefonins e energjie. Denant di chestis prospetivis, nissun al olse meti bec. Te politiche regjonâl no si fevele plui di agriculture. Ni in ben, ni in mâl. Par chei di vie Sabbadini tal setôr primari no sono plui problemis? Dut funzionial ben? Baste impegnâ i bêçs de PAC e dal PSR? Ma dopo rivino aes aziendis? Funzionial il gnûf “organisim paiadôr”? Covential ancjemò l’ERSA o, se al ven gjavât, si inacuarzino dome i dipendents?
◆ I contadins a varessin ce lamentâsi. Pecjât che no ‘nd è plui contadins tai nestris paîs. ❚