Sfuei Mensîl Furlan Indipendent
Archivi de Patrie

ZÂL PAR FURLAN. 3. Delit in vie del Lavoro

............

Une femine ae CAMIN e jere tant che une neveade in Avost e Marie, cu la piçule sot il braç, no veve fate diference. Cognossint l’ambient, o podevi imagjinâ lis solitis batudis di biâts vedrans. Viodintle cu la frute, di sigûr cualchidun al varà dite, fasint ridi ducj: «Pieri a ‘nd à jemplade une altre». Chest parcè che su Pieri si savevin dôs robis di sigûr: che al jere un di chei di “Nuova Eucarestia” e che la sô femine e veve plui cuars di chei che a son intun caiâr. Potence de fede tal perdon di Diu.

Ancje la segretarie e veve cjalât Marie riduçant, ma si jere cidinade a colp cuant che al jere rivât il fi dal paron. Pieri le veve fate jentrâ tal so ufici, cul massim rispiet, mostrant di scoltâle cun dute la comprension dal marimont. Ma la fieste in mascare, no jere durade. Jê e voleve savê il parcè e il par co. Cui ise cheste cravuate? Dulà sono lâts? Cemût aial fat lui, Pieri, a savê dut? Il fi dal paron, inclaudât te sô poltronute cu lis ruedis, cence rispuestis a chês domandis, al veve tacât a sustâsi, ma jê e veve passât cuatri confins, par vignî in Friûl, e no veve sigûr pôre di chel alì. Se lui al alçave la vôs, je le alçave di plui. Cuant che jê e veve dit che e sarès lade dai carabinîrs, il fi dal paron al jere saltât su la cjadree, cuntun scat di pôre, o di rabie. Al veve batude la man su la scrivanie e i veve rinfaçât i bêçs che i veve dâts, berlant di dut. Ben planc si jere calmât, i veve dit che i carabinîrs a varessin metût il nâs dapardut, al sarès saltât fûr che Kosim al lavorave dopo cene, dopo di un turni di dîs oris vie pal dì, e tra l’altri a neri. Disint cussì si jere fat amichevul, cuasi compliç. Al veve tirât fûr che al stave juste juste par clamâle parcè che a jerin saltâts fûr ancjemò un miâr di euros, straordenaris che al veve fat in neri, e che se e fos lade dai carabinîrs, nol podeve dâjai, che anzit e varès vût di tornâi chei che i veve bielzà dâts.

Marie, prin di vê Mirela, e lavorave intune cooperative di chês par mût di dî. Une di chês che a fasin lis puliziis tes fabricutis che a dan a esternis chel gjenar di lavôrs. Un lavorat sporc e mal paiât, ma lavôr. Che i deve bêçs siei. Chel lavôr jal veve tirât fûr propit Pieri, midiant di un so amì di “Nuova Eucarestia”, che al jere dirigjent de cooperative. Cuant che al veve savût che e spietave la frute, chel stes dirigjent, al jere stât contenton. I veve fat un biel discors su la sacralitât dal part tant che benedizion di Diu. Jê aromai lu cognosseve, chel dirigjent e la int come lui e Pieri, duncje no si jere maraveade che no i vessin rinovât il contrat scjadût il mês daspò. Dopo dal part, cence nissun dongje a judâle, si jere lassade convinci di Kosim a stâ a cjase, che come bêçs a bastavin i siei. Chei di lui. Intun cont intestât a ducj i doi, ma cun dentri i bêçs di lui.

Marie e veve passât cuatri confins, par vignî in Friûl, e corot nûf vuardiis pe strade.

E veve cjapât i bêçs di Pieri e e jere lade vie cu la muse dure, cence saludâ. Dome daspò, pe strade, intun toc che al coreve tal mieç des braidis, si jere fermade a vaî cu la frute sentade daûr te machine che le cjalave cence capî.

A jerin passadis setemanis, e di lui no si jere savût nuie. A jerin rivâts estrats conts e boletis e lui nol veve cjolt un franc de bancje e nol veve fate une sole clamade dal so telefonin. Nuie di nuie. La famee in Romanie no saveve ce dî e jê e jere bessole. Si jere ricuardade che Kosim al veve un amì, une volte. Un amì furlan. Un studiât. Un che al saveve tantis robis. E chel amì si clamave ‘Sef. E o jeri jo.

«Non puoi vedere tu?», mi veve dite.

(3, al va indevant)

Igor Londero

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +