ZÂL PAR FURLAN. 4. Delit in vie del Lavoro

Un romanç zâl a pontadis, che lant daûr aes olmis di une sparizion, nus puartarà dentri un mont pôc contât e fûr mode: chel di ogni dì. I cjatarìn operaris e parons, ma ancje puestins e operadôrs sociâi, ducj a fâ i conts cun cheste ere di precarietât esistenziâl dulà che jessi amì di “chel just” al è dispès plui impuartant di savê costruî un mont cuntune clâf a stele, ma dulà che al resist ancjemò cualchidun
bon di rinunziâ a dut par fâ slusî un tic di veretât.
Intant che Marie mi contave dai siei dafâs, jo o vevi mandât indenant i miei. Lucio, une taçute di cafè a la volte, al veve finide la butilie e tra un moment o varès vût di puartâlu tal gabinet e fâlu pissâ. Finît di contâ, sedi Marie che la frute si jerin metudis a cjalâmi cul stes tai dai voi, cu la stesse plete sore des ceis. Ma il colôr dai voi di Mirela al jere chel celest dal pari. E cumò o jeri jo a jessi inclaudât su la cjadree.«Viodi ce?» porco boie. «Ce saio jo dal to om?», o pensavi. A jerin agns che no lu viodevi. Cuant che mi vevin parât vie de CAMIN, no si jere plui fat sintî e jo o jeri restât mâl. Lu vevi cjatât mês daspò: al veve rivât a cjolisi la machine gnove e al jere dut braurôs. Jo o ziravi ancjemò cun chê di gno nono, che e jere plui vecje di Kosim, e o vevi un contrat di trê mês tant che puestin.
Il puestin…
Capitavial cussì a Marlowe o a Pepe Carvalho? Si impiave une lampadine e po dopo…
Mi vignive di ridi, e Marie si jere subit inacuarte.
Sigûr: se o fasès l’investigadôr, o domandarès ai puestins. Lôr a san dut di ducj. O domandarès a Franco. Sì, a Franco il puestin. Ma jo no soi un investigadôr. Jo o viôt dai mats.
Però une domande a Franco, parcè no?
Mirela e veve alçât il dedut, e mi veve mostrât a sô mari, sclacagnant. «Ve che al rît», e someave che e disès.
Aromai, chês dôs mi vevin freât.
In chei agns, Franco il puestin al lassave il so vespin tal curtîl dai fraris, dongje de pueste. Jo e altris delincuents minorîi o jentravin e o dopravin il vespin par sgurlâ sù e jù. Lui, se nus brincave, si racomandave di no lassâlu cence missele. Lui al jere cussì: masse bon par restâ sincîr dut il dì.
Dopo cuindis agns, tal so cûr, nol jere mudât. Ce che al jere mudât al jere il so fiât, il numar dai dincj, il colôr des voglariis. O jeri lât a cirîlu a cjase, tor trê di dopomisdì e par cûl lu vevi cjatât. La alternative e sarès stade chê di lâ a brincâlu te ostarie tor cinc, par cjatâlu bielzà cjoc. E a part chest, no jere mai une biele idee puartâ Lucio te ostarie, cu la sô manie di parâ jù cualsisei licuit che i capitave sot man.
Franco al jere stât content di viodimi.
«Ti rindistu cont?», si jere metût a contâ un volte sentâts te verande. «A volevin mandâmi in pension a mi! Un puestin decorât!»
Franco al jere pardabon stât decorât. Ogni dì al passave alì de Vigjute, une vedue che e stave intune barache tal mieç des braidis. Par jê, simpri bessole, al jere un event, e lu spietave simpri difûr, lavoruçant ca e là a seconde de stagjon. Se nol veve pueste, i puartave cualchi publicitât o fufigne, e jê i deve une birute piçule e a fasevin dôs cjacaris. Chê buinore però, la Vigjute no jere. Lui le veve clamade. Al veve sunât il sunet dal motorin che i vevin dât tal puest dal vecjo vespin. Par un nuie nol jere lât dret, ma, un pôc la voie de birute, un pôc che al nasave alc, al veve tirât jù il cavalet dal motorin e al jere lât a tucâ pal barcon. Spiant dentri, al veve viodude la Vigjute distirade par tiere, cui pîts viers di lui e il scarpet mieç sbrissât fûr. Come une furie, al veve vierte la puarte di cjase. La Vigjute e someave indurmidide, sul paviment, cu la muse insù e une aureule di sanc daûr dal cjâf. Cence tocjâle, al veve clamade la ambulance e, par fâle curte, la Vigjute le veve puartade fûr par un pêl. Chê volte, lui al jere lât a finîle sul gjornâl. E un papavar de pueste i veve dade un medaie.
«Franco, ti visistu di Kosim Sabau?»
«Ah, chel fantat che al è sparît… puare femine! A mi no me contin che al è scjampât cun chê badante…»
I puestins a san dut di ducj.
(4, al va indevant)
Igor Londero